سہرسہ(سالک کوثر امام) ضلع میں اتوار کی شب ایک نہایت افسوسناک واقعہ پیش آیا، جہاں گھریلو تنازع کے بعد ایک خاتون نے اپنے پانچ بچوں کو زہر آلود دودھ پلا دیا اور بعد ازاں خود بھی زہر پی لیا۔ واقعہ بنما اٹہری تھانہ حلقہ کے بھگوان پور گاؤں کا بتایا جا رہا ہے۔اطلاعات کے مطابق سونی دیوی (40) کا اپنی ساس کے ساتھ جائیداد کے معاملے پر جھگڑا ہوا تھا، جس کے بعد غصے اور جذباتی کیفیت میں انہوں نے یہ انتہائی قدم اٹھایا۔ متاثرہ بچوں میں پریتی کماری (14)، رچنا کماری (13)، سپنا کماری (6) اور پانچ سالہ جڑواں بھائی رام کمار اور لکھن کمار شامل ہیں۔مقامی لوگوں کے مطابق رات تقریباً ڈھائی بجے ایک بچے نے تکلیف کی حالت میں کسی طرح گھر کا دروازہ کھولا، جس کے بعد پڑوسیوں کو واقعے کی اطلاع ملی۔ اہل علاقہ نے فوری طور پر تمام افراد کو سہرسہ صدر اسپتال پہنچایا، جہاں ابتدائی طبی امداد کے بعد حالت نازک ہونے پر نارائن میڈیکل کالج اینڈ اسپتال ریفر کر دیا گیا۔ڈاکٹروں کے مطابق جڑواں بچوں رام کمار اور لکھن کمار کی حالت تشویشناک ہے اور انہیں وینٹی لیٹر سپورٹ پر رکھا گیا ہے، جبکہ دیگر متاثرین کی حالت پر مسلسل نظر رکھی جا رہی ہے۔ طبی ماہرین کا کہنا ہے کہ زہر کے اثرات ختم ہونے میں تقریباً 48 گھنٹے لگ سکتے ہیں، جس کے بعد ہی مکمل صورتحال واضح ہو سکے گی۔پولیس نے واقعے کی اطلاع ملتے ہی تفتیش شروع کر دی ہے۔ سہرسہ صدر تھانہ کے افسران کے مطابق گھریلو تنازع، جائیداد کے مسئلے اور دیگر پہلوؤں سے معاملے کی جانچ کی جا رہی ہے۔ خاتون کے شوہر، جو دہلی میں راج مستری کا کام کرتے ہیں، واقعے کی خبر ملنے کے بعد سہرسہ روانہ ہو چکے ہیں۔یہ دل دہلا دینے والا واقعہ علاقے میں غم و افسوس کا سبب بنا ہوا ہے، جبکہ اہل محلہ اور خاندان کے بیشتر افراد اس معاملے پر خاموشی اختیار کیے ہوئے ہیں۔
