مظفرنگر (پریس ریلیز؍ہماراسماج)مدرسہ یاسینیہ سراج العلوم کھڈہ ضلع مظفرنگر میں ایک اہم اصلاحی نشست منعقد ہوئی، جس میں جمعیۃ علماء ہند کے ناظم عمومی مولانا حکیم الدین قاسمی نے بعد نماز عشاء طلبہ سے خطاب کیا۔انہوں نے اپنے خطاب میں ماہ ذیقعدہ کی فضیلت بیان فرمائی اور رسول اکرم صلی اللہ علیہ وسلم کی حیات طیبہ کو صبر و استقامت اور قربانی کا کامل نمونہ قرار دیتے ہوئے کہا کہ آپ صلی اللہ علیہ وسلم کی پوری زندگی آزمائشوں سے عبارت ہے۔ مکہ مکرمہ میں پیش آنے والی شدید مشکلات، طائف کی اذیتیں اور دیگر مصائب کے باوجود آپ نے صبر و ثبات کا دامن نہیں چھوڑا۔ انہوں نے واقعہ ہجرت کو اسلامی تاریخ کا نقطۂ آغاز قرار دیتے ہوئے کہا کہ یہ ہمیں سکھاتا ہے کہ دین کے لیے ہر طرح کی قربانی دینا ضروری ہے۔موصو ف نے حضرت ابوبکر صدیق رضی اللہ عنہ کی رفاقت کا ذکر کرتے ہوئے بتایا کہ ہجرت کے موقع پر ان کی والہانہ محبت اور قربانی امت کے لیے بہترین نمونہ ہے، حتیٰ کہ حضرت عائشہ رضی اللہ عنہا کے مطابق یہ پہلا موقع تھا کہ کسی کو خوشی میں روتے ہوئے دیکھا گیا۔ مزید برآں انہوں نے اس امر کی طرف بھی اشارہ کیا کہ اسلامی تقویم کا آغاز واقعۂ ہجرت سے حضرت عمر فاروق رضی اللہ عنہ کے دور میں کیا گیا، جو اس واقعہ کی اہمیت کو ظاہر کرتا ہے۔مولانا قاسمی نے طلبہ کو تلقین کی کہ وہ قرآن مجید سے مضبوط تعلق قائم رکھیں، نمازوں کی پابندی کریں اور ہر حال میں صبر و حوصلہ کو اختیار کریں ،باوضو رہا کریں زندگی نورانی بن جائے گی انشاء اللہ ۔انہوں نے اس بات پر بھی زور دیا کہ مدارس دینیہ دراصل صفہ کی یادگار ہیں، جہاں سے علم، اخلاص اور خدمت دین کا جذبہ پروان چڑھتا ہے۔اس موقع پر مدرسہ کے مہتمم قاری محمد جعفر صاحب اور جملہ اساتذہ نے ناظم عمومی کا پرتپاک استقبال کیا اور ادارہ کی دینی ، تعلیمی و تعمیری خدمات پر روشنی ڈالی اور بیحد اطمینان کااظہار کرتے ہوئے فرمایا کہ الحمدللہ یہ ادارہ علاقے کے ممتازمدرسوں میں شمار ہوتاہے۔اسی نشست میں مولانا عظیم اللہ صدیقی سکریٹری جمعیۃ علماء ہند نے بھی طلبہ سے خطاب کیا۔ انہوں نے طلبہ کو ترک معاصی کی تلقین کرتے ہوئے کہا کہ علم کے ساتھ عمل اور تقویٰ لازم ہے ۔ شرکاء میں مفتی مدثر، مفتی عثمان، مفتی عرفان، مفتی نوشاد، مولاناصداقت ،قاری مدثر، مولانا عبدالصمد ،مولانا محمدعادل ندوی، قاری شہزاد، قاری سلمان، قاری نعیم ،قاری عارفین ،قاری عبدالرب، قاری طیب ،قاری اعظم، قاری انتظار، قاری ساجد، عبدالماجد، ماسٹر اسلام، ماسٹرعمر ،مولانا صادق، قاری عبدالقادر،قاری عابدمحاسب مدرسہ وغیرہ کے نام قا بل ذکرہیں ۔آخر میں حضرت ناظم عمومی صاحب کی دعاء پرمجلس کااختتام ہوا۔
