کشن گنج، (نامہ نگار) کشن گنج ضلع میں مولانا توصیف رضا مظہری کی مشتبہ موت اور قتل کے خلاف آج مقامی شہریوں، سماجی تنظیموں اور مختلف عوامی نمائندوں کی جانب سے ضلع مجسٹریٹ (ڈی ایم) کشن گنج کو ایک مفصل یادداشت پیش کی گئی۔ اس یادداشت کے ذریعے واقعہ کی اعلیٰ سطحی اور غیر جانبدارانہ جانچ اور متاثرہ خاندان کو انصاف دلانے کا مطالبہ کیا گیا۔یادداشت میں بتایا گیا ہے کہ مولانا توصیف رضا مظہری (عمر تقریباً 26–30 سال)، ساکن گاؤں باکھوٹولی، بلاک ٹھاکرگنج، ضلع کشن گنج، ایک امام اور مدرسہ کے استاد تھے۔ وہ 26 اپریل 2026 کو بریلی شریف سے عرسِ تاج الشریعہ میں شرکت کے بعد اپنے گھر واپس لوٹ رہے تھے۔ اسی دوران بریلی کینٹ ریلوے اسٹیشن کے قریب چلتی ٹرین میں مشتبہ حالات میں ان کی موت ہوگئی اور ان کی لاش پلپور کمال پور علاقے کے پاس ریلوے ٹریک کے کنارے سے برآمد ہوئی۔مرحوم کے اہل خانہ اور مقامی لوگوں نے سنگین الزام عائد کیا ہے کہ کچھ سماج دشمن اور شدت پسند عناصر نے ان کی مذہبی شناخت (داڑھی اور ٹوپی) کی بنیاد پر ان کے ساتھ مارپیٹ کی اور انہیں چلتی ٹرین سے باہر پھینک دیا۔ اہل خانہ کے مطابق، واقعہ سے پہلے مولانا نے اپنی اہلیہ کو فون کر کے اپنے ساتھ ہونے والی مارپیٹ کی اطلاع بھی دی تھی۔اس واقعہ کو نہایت سنگین، غیر انسانی اور قانون و انتظام کے لیے چیلنج قرار دیتے ہوئے عوام میں شدید غم و غصہ اور عدم تحفظ کا احساس پایا جا رہا ہے۔ واقعہ کے خلاف کشن گنج سمیت مختلف علاقوں میں پُرامن ریلی، دھرنا اور کینڈل مارچ منعقد کر کے انصاف کا مطالبہ کیا جا رہا ہے۔میمورنڈم میں انتظامیہ سے درج ذیل اہم مطالبات کیے گئے ہیں:معاملے کی اعلیٰ سطحی اور غیر جانبدارانہ جانچ کے لیے ایس آئی ٹی (SIT) تشکیل دی جائے۔ملزمان کی جلد شناخت کر کے ان کی گرفتاری یقینی بنائی جائے۔واقعہ کی جانچ ہیٹ کرائم/ماب لنچنگ کے زاویے سے کر کے مناسب دفعات کے تحت مقدمہ درج کیا جائے۔متاثرہ خاندان کو مناسب مالی معاوضہ اور سرکاری امداد فراہم کی جائے۔مرحوم کی بیوہ کو کفالت کے تحت سرکاری ملازمت دی جائے۔ریلوے مسافروں کی حفاظت کے لیے سخت اور مؤثر حفاظتی انتظامات کیے جائیں۔معاملے کی اعلیٰ سطحی نگرانی کو یقینی بنا کر جلد انصاف فراہم کیا جائے۔اس موقع پر یادداشت پیش کرنے والوں میں نمایاں طور پر مفتی اطہر جاوید قاسمی (ضلع پریشد رکن نمائندہ، کشن گنج)، مولانا شمیم ریاض ندوی (صدر، مجلس علماء ملت)، عبدالماجد (ضلع صدر، ایس ڈی پی آئی)، مولانا آفتاب اظہر صدیقی (صوبائی جنرل سکریٹری، مجلس احرار)، قاری محیط اختر اور مولانا آصف قاسمی ارراباڑی سمیت دیگر معزز افراد موجود تھے۔تمام حاضرین نے انتظامیہ سے مطالبہ کیا کہ غیر جانبدارانہ جانچ کر کے ملزمان کو سخت سے سخت سزا دی جائے اور متاثرہ خاندان کو جلد انصاف فراہم کیا جائے۔
