نئی دہلی،سماج نیوز سروس:پنجاب کے جالندھر اور امرتسر میں ہوئے بم دھماکوں پر سیاست کر رہی بی جے پی پر عام آدمی پارٹی نے سخت جوابی حملہ کیا ہے۔ آپ کے رکنِ پارلیمنٹ سنجے سنگھ نے کہا کہ مغربی بنگال کا انتخاب لوٹنے کے بعد بی جے پی اب کہہ رہی ہے کہ اگلا نشانہ پنجاب ہے۔ پنجاب میں بم دھماکے کرا کے امن و امان خراب کرنا اور لوگوں میں نفرت و جھگڑے پیدا کرنا ہی بی جے پی کا مشن پنجاب ہے۔ امرتسر اور جالندھر میں جو بم دھماکے ہوئے، وہ بی جے پی کی انتخابی حکمت عملی کا حصہ ہیں۔ انہوں نے کہا کہ بی جے پی اور آئی ایس آئی کے درمیان گہرے تعلقات ہیں۔ بی جے پی آئی ایس آئی کے ذریعے ملک میں بم دھماکے کرانے اور امن و سکون خراب کرنے کا کام کرتی ہے۔ لیکن پنجاب میں بی جے پی کی نفرت کی سیاست کامیاب نہیں ہوگی۔ اگر پنجاب کا امن خراب کرنے کی کوشش کی گئی تو وہاں کی عوام منہ توڑ جواب دے گی۔جمعرات کو آپ ہیڈکوارٹر میں پریس کانفرنس کرتے ہوئے سنجے سنگھ نے کہا کہ بدھ کے روز پنجاب میں دو مقامات پر بم دھماکے ہوئے اور اس کے بعد بی جے پی بوکھلاہٹ میں بیان بازی کر رہی ہے۔ انہوں نے کہا کہ 2017 کے پنجاب اسمبلی انتخابات سے پہلے، جب وہاں اکالی دل اور بی جے پی کی حکومت تھی، تب بھی موڑ میں اسی طرح کا دھماکہ کرایا گیا تھا، لیکن آج تک اس کی حقیقت سامنے نہیں آئی۔ اس وقت حکومت بی جے پی اور اکالی دل کی تھی۔اب جب یہ دھماکے ہوئے ہیں تو مغربی بنگال کے انتخابات کے فوراً بعد بی جے پی کہہ رہی ہے کہ اب ان کا مشن پنجاب ہے۔ بی جے پی کا مشن پنجاب دراصل پنجاب میں دھماکے کرانا، امن خراب کرنا، نفرت پھیلانا اور لوگوں میں فساد کرانا ہے۔سنجے سنگھ نے کہا کہ بی جے پی والے سوال اٹھا رہے ہیں کہ انہیں آئی ایس آئی سے کیسے جوڑا جا رہا ہے، جبکہ بی جے پی کا آئی ایس آئی کے ساتھ پرانا تعلق رہا ہے۔ پلوامہ حملے میں ہمارے جوان شہید ہوئے، لیکن آج تک یہ معلوم نہیں ہو سکا کہ 350 کلو آر ڈی ایکس ہندوستان کی سرحد میں کیسے داخل ہوا۔ پہلگام میں ہماری بہنوں کی مانگ کا سندور اجاڑ دیا گیا، آپریشن سندور بھی ہو گیا، مگر آج تک یہ جواب نہیں ملا کہ وہاں سے سکیورٹی کس کے حکم پر ہٹائی گئی تھی۔انہوں نے کہا کہ ملک کی حکومت اور جموں و کشمیر کی قانون و انتظامیہ بی جے پی کے ہاتھ میں ہے، پھر بھی وہاں سے سکیورٹی ہٹا دی گئی۔ دہشت گرد آئے، لوگوں کو قتل کیا اور فرار ہو گئے، لیکن آج تک یہ جواب نہیں ملا کہ 350 کلو آر ڈی ایکس کہاں سے آیا اور پہلگام کی سکیورٹی کیوں ہٹائی گئی؟ سنجے سنگھ نے مزید کہا کہ پنجاب کے پٹھان کوٹ میں دہشت گردانہ حملہ ہوا تھا، جس میں ہمارے جوان شہید ہوئے، اور اس حملے کی جانچ کے لیے بی جے پی نے اسی تنظیم کو بلایا تھا جس سے اس کے چولی دامن کا ساتھ ہے۔ وہاں آئی ایس آئی آئی تھی اور وہ مودی حکومت کے دور میں آئی تھی۔مودی جی نے آئی ایس آئی کو ہندوستان بلایا اور کہا کہ پٹھان کوٹ آ کر بھارت ماتا کے شہید سپوتوں کی جانچ کرے۔ یہی آئی ایس آئی مختلف مقامات پر دہشت گردانہ کارروائیاں انجام دیتی ہے اور اسی آئی ایس آئی کے ساتھ بی جے پی کے گہرے تعلقات ہیں۔انہوں نے الزام لگایا کہ بی جے پی اسی آئی ایس آئی کے ذریعے پورے ملک میں امن خراب کرنے، دھماکے کرانے اور فسادات پھیلانے کا کام کرتی ہے۔سنجے سنگھ نے کہا کہ امرتسر اور جالندھر میں جو دھماکے ہوئے ہیں، وہ بی جے پی کی انتخابی سیاست کی شروعات اور اس کے مشن پنجاب کی ایک مثال ہیں۔ لیکن میں بی جے پی کے لوگوں سے کہنا چاہتا ہوں کہ یہ پنجاب ہے، اگر یہاں کا امن خراب کرنے کی کوشش کی گئی تو عوام منہ توڑ جواب دے گی اور انتخابات میں بی جے پی کی ضمانتیں ضبط کرا دے گی۔
