جامعہ شاہ جنگی پیر میں مفت آئی کیمپ کا انعقاد،105 مریضوں کا معائنہ و علاج

بھاگلپور (قمر امان) خانقاہِ عالیہ شہبازیہ ملا چک شریف،بھاگلپور اور پٹنہ ایمس میں اپنی طبی خدمات انجام دینے والے ایس جی ایس (SGS) آئی ہاسپیٹل کے اشتراک سے جامعہ شاہ جنگی پیر، شاہ جنگی حبیب پور،بھاگلپور میں آنکھوں کے امراض کے علاج کے لیے ایک عظیم الشان مفت میڈیکل کیمپ کا انعقاد کیا گیا۔ اس فلاحی کیمپ میں ماہر ڈاکٹروں کی ٹیم نے علاقے کے عوام کو مفت طبی سہولیات فراہم کرتے ہوئے 105 مریضوں کا معائنہ اور علاج کیا۔کیمپ کی قیادت معروف ماہرِ امراضِ چشم ڈاکٹر آنند پرکاش نے کی،جبکہ ان کے ساتھ موجود میڈیکل ٹیم نے نہایت خلوص اور ذمہ داری کے ساتھ مریضوں کی آنکھوں کا معائنہ کیا۔ اس دوران بچوں،نوجوانوں، خواتین اور بزرگوں سمیت مختلف عمر کے افراد نے کیمپ سے استفادہ حاصل کیا۔مریضوں کو آنکھوں کی بیماریوں سے متعلق ضروری مشورے دیے گئے اور متعدد افراد کو مفت ادویات بھی فراہم کی گئیں۔بعض مریضوں کو مزید بہتر علاج اور آپریشن کے لیے اسپتال آنے کا مشورہ بھی دیا گیا۔اس موقع پر جامعہ شاہ جنگی پیر، بھاگلپور کے ذمہ داران نے کیمپ کے کامیاب انعقاد میں بھرپور تعاون پیش کیا۔جامعہ کے صدر محمد آفتاب عالم،سکریٹری محمد نشاط افروز،خازن محمد ذاکر حسین اور دیگر ممبران نے میڈیکل ٹیم کا استقبال کرتے ہوئے ان کی خدمات کو سراہا۔انہوں نے کہا کہ اس طرح کے فلاحی اور طبی کیمپ عوامی خدمت کا بہترین ذریعہ ہیں،جن سے غریب اور ضرورت مند افراد کو بڑی راحت حاصل ہوتی ہے۔مقررین نے کہا کہ موجودہ دور میں آنکھوں کی بیماریوں میں تیزی سے اضافہ ہو رہا ہے،ایسے میں عوام کے درمیان بیداری پیدا کرنا اور مفت علاج کی سہولت فراہم کرنا ایک اہم سماجی خدمت ہے۔انہوں نے امید ظاہر کی کہ آئندہ بھی اسی طرح کے طبی و رفاہی پروگرام منعقد کیے جاتے رہیں گے تاکہ زیادہ سے زیادہ لوگ فائدہ اٹھا سکیں۔علاقے کے لوگوں نے بھی اس مفت آئی کیمپ کے انعقاد پر خوشی کا اظہار کرتے ہوئے خانقاہِ عالیہ شہبازیہ،ایس جی ایس آئی ہاسپیٹل اور جامعہ شاہ جنگی پیر کے ذمہ داران کا شکریہ ادا کیا۔کیمپ کے اختتام پر عوام نے ایسے فلاحی اقدامات کو وقت کی اہم ضرورت قرار دیا۔