جے این میڈیکل کالج میں تھوراسک ٹیومر کی اولین ویڈیو اسسٹیڈ تھوراکوسکوپک سرجری کامیابی سے تکمیل کو پہنچا

علی گڑھ،سماج نیوز سروس : جواہر لعل نہرو میڈیکل کالج (جے این ایم سی)، علی گڑھ مسلم یونیورسٹی کے شعبہ کارڈیو تھوریسک اینڈ ویسکولر سرجری نے تھوراسک ٹیومر کو نکالنے کے لیے پہلی مرتبہ ویڈیو اسسٹیڈ تھوراکوسکوپک سرجری (وی اے ٹی ایس) کامیابی کے ساتھ انجام دی، جو ادارے میں کم سے کم چیرا لگا کر کی جانے والی جدید سرجری خدمات کے میدان میں ایک اہم پیش رفت ہے۔ ایک خاتون کو گردن اور سینے میں درد کی شکایت کے بعد میڈیکل کالج لایا گیا تھا۔ اس کی طبی جانچ میں ریڑھ کی ہڈی سے منسلک ایک ٹیومر کی موجودگی کا انکشاف ہوا۔ یہ آپریشن ڈاکٹر محمد اعظم حسین، ڈاکٹر سید شمائل ربانی اور ڈاکٹر عامر محمد پر مشتمل ٹیم نے کیا۔ اینستھیسیا سے متعلق خدمات ڈاکٹر مناظر اطہر اور ان کی ٹیم نے انجام دیں۔ آپریشن تھیٹر ہی میں کامیابی کے ساتھ مریضہ کی سانس کی ٹیوب نکال دی گئی، جو آپریشن کے دوران اور بعد میں متاثرہ خاتون کی مستحکم حالت کی علامت ہے۔ شعبہ کارڈیو تھوریسک اینڈ ویسکولر سرجری کے چیئرپرسن ڈاکٹر محمد اعظم حسین نے کہا کہ شعبہ میں طویل عرصے سے اوپن سرجری کے ذریعے تھوراسک آپریشن کیے جاتے رہے ہیں، تاہم وی اے ٹی ایس تکنیک کے شامل ہونے سے شعبہ کی سرجری صلاحیتوں میں نمایاں اضافہ ہوا ہے۔ ڈاکٹر عامر محمد نے اس کیس کو چیلنجنگ قرار دیتے ہوئے کہا کہ ٹیومر ریڑھ کی ہڈی سے نکلا ہوا تھا۔ ڈاکٹر سید شمائل ربانی نے وی اے ٹی ایس طریقہ علاج کے فوائد بیان کرتے ہوئے کہا کہ اس سے مریض جلد صحت یاب ہوتا ہے اور ظاہری طور پر بھی بہتر نتائج حاصل ہوتے ہیں۔ آپریشن کے دوران سلمان، اسلم اور کامران نے سرجری ٹیم کی معاونت کی، جبکہ بعد از آپریشن نگہداشت نرسنگ افسران سہیل، کیلاش اور رنکو نے انجام دی۔ مریض کی دیکھ بھال میں ریزیڈنٹ ڈاکٹروں میں ڈاکٹر عظیم، ڈاکٹر پرو، ڈاکٹر عرفان اور ڈاکٹر ہرشیت شامل تھے۔ فیکلٹی آف میڈیسن کے ڈین پروفیسر محمد خالد نے کہا کہ یہ کامیاب سرجری، جے این ایم سی میں جدید سرجری منصوبہ بندی اور آپریشن سے قبل و بعد کی نگہداشت کے اعلیٰ معیار کی عکاس ہے۔ پرنسپل اور سی ایم ایس ڈاکٹر انجم پرویز نے ٹیم کو مبارکباد پیش کرتے ہوئے معیاری اور کفایتی طبی خدمات فراہم کرنے کے تئیں ادارے کے عزم کا اعادہ کیا۔ میڈیکل سپرنٹنڈنٹ ڈاکٹر نیر آصف نے اس دستیابی کو جے این ایم سی کے لیے باعث فخر قرار دیتے ہوئے کہا کہ اس نوعیت کے جدید سرجری اقدامات ادارے کی بڑھتی ہوئی مہارت اور پیشہ ورانہ صلاحیتوں کی عکاسی کرتے ہیں۔