دھرم شالہ، (یواین آئی ) آئی پی ایل 2026 کے 55 ویں میچ میں دہلی کیپیٹلز کے ہاتھوں شکست کے بعد پنجاب کنگز کے کپتان شریاس ایر نے اپنی ٹیم کی کارکردگی پر شدید مایوسی کا اظہار کیا ہے۔ انہوں نے واضح الفاظ میں کہا کہ 210 رنز کا بڑا ہدف دینے کے باوجود ٹیم کی ناقص بولنگ اور غیر معیاری فیلڈنگ میچ ہارنے کی اصل وجہ بنی۔میچ کے بعد میڈیا سے گفتگو کرتے ہوئے شریاس ایر نے ٹیم کی خامیوں کو بے نقاب کیا۔ پنجاب کے فیلڈرز نے دہلی کے بلے بازوں کے دو اہم کیچز چھوڑے۔ حیران کن طور پر اس سیزن میں پنجاب کی ٹیم اب تک 19 کیچز چھوڑ چکی ہے، جو کسی بھی ٹیم کی جانب سے سب سے زیادہ تعداد ہے۔ایر کے مطابق، دھرم شالہ کی وکٹ پر جہاں گیند ‘سیم اور ‘سونگ ہو رہی تھی، وہاں 210 رنز ایک دفاع کے قابل اسکور تھا۔ انہوں نے کہا، "میں بات گھماؤں گا نہیں، ہم نے کم از کم 30 رنز اضافی دیے۔”کرکٹ ماہرین اور شائقین اس وقت حیران رہ گئے جب آئی پی ایل کی تاریخ کے کامیاب ترین بولر یجوویندر چہل سے ایک اوور بھی نہیں کروایا گیا۔ اس پر وضاحت دیتے ہوئے ایر نے کہا”چہل کو بولنگ دینے کا خیال ہمارے ذہن میں تھا، لیکن چونکہ گیند بہت زیادہ موو ہو رہی تھی اور فاسٹ بولرز کو مدد مل رہی تھی، اس لیے میں نے پیسرز پر بھروسہ کیا۔ ہمیں امید تھی کہ وہ وکٹیں نکال لیں گے، لیکن بدقسمتی سے ایسا نہ ہو سکا۔
