نئی دہلی ، سماج نیوز سروس: بھارتیہ جنتا پارٹی (بی جے پی) کے سینئر لیڈر اور این ڈی اے اتحاد کے اہم چہرے ہمنتابسواسرما نے منگل کے روز آسام کے وزیراعلیٰ کے طور پر مسلسل دوسری بار حلف اٹھا لیا۔ اس کے ساتھ ہی ریاست میں بی جے پی کی قیادت والی این ڈی اے حکومت کی مسلسل تیسری مدت کا باضابطہ آغاز ہو گیا۔حلف برداری کی یہ پروقار تقریب گوہاٹی کے خاناپاڑا علاقے میں واقع ویٹرنری کالج میدان میں منعقد ہوئی، جہاں ملک بھر سے اہم سیاسی شخصیات، مرکزی وزراء اور این ڈی اے کے زیر اقتدار مختلف ریاستوں کے چیف منسٹر شریک ہوئے۔ تقریب میں وزیر اعظم نریندر مودی کی موجودگی نے اسے مزید اہم بنا دیا۔آسام کے گورنرلکشمن پرساد آچاریہ نے صبح 11 بج کر 40 منٹ پر ہمنتا بسوا سرما اور دیگر چار وزراء کو عہدے اور رازداری کا حلف دلایا۔ہمنتا بسوا سرما کے ساتھ جن چار وزرا نے بطور وزیر حلف لیا، ان میں بی جے پی کی اجنتانیوگ، بی جے پی کے سینئر لیڈر رامیشور تیلی، آسام گنا پریشد (اے جی پی) کے لیڈر اتل بورا اور بوڈولینڈ پیپلز فرنٹ (بی پی ایف) کے لیڈر چرن بورو شامل ہیں۔اجنتا نیوگ اس سے قبل سرما کابینہ میں وزیر خزانہ کی ذمہ داری سنبھال چکی ہیں، جبکہ اتل بورا محکمہ زراعت کے وزیر رہے۔ چرن بورو نے سابقہ حکومت میں محکمہ ٹرانسپورٹ کی قیادت کی تھی۔ دوسری جانب رامیشور تیلی مرکزی وزیر کے طور پر خدمات انجام دینے کے بعد دوبارہ ریاستی سیاست میں واپس آئے ہیں۔آسام اسمبلی انتخابات میں این ڈی اے اتحاد نے شاندار کامیابی حاصل کرتے ہوئے 126 رکنی اسمبلی میں مجموعی طور پر 102 نشستیں جیتیں۔ بی جے پی نے اکیلے 82 نشستیں حاصل کیں، جبکہ اس کے اتحادی آسام گنا پریشد اور بوڈولینڈ پیپلز فرنٹ نے 10، 10 نشستیں اپنے نام کیں۔یہ 2016 کے بعد تیسرا موقع ہے جب آسام میں این ڈی اے حکومت قائم ہوئی ہے۔ 2016 میں پہلی مرتبہ بی جے پی اتحاد نے اقتدار حاصل کیا تھا، اُس وقت حکومت کی قیادت موجودہ مرکزی وزیر سربانند سونووال نے کی تھی۔سیاسی مبصرین کے مطابق ہمنتا بسوا سرما آسام کی تاریخ میں پہلے غیر کانگریسی لیڈر بن گئے ہیں جو مسلسل دو بار وزیر اعلیٰ بنے ہیں۔حلف برداری تقریب سے قبل سربانند سونووال نے اسے ’’آسام کے عوام کیلئے عظیم دن‘‘ قرار دیا۔ انہوں نے عوام کا شکریہ ادا کرتے ہوئے کہا کہ مسلسل تیسری بار این ڈی اے کو اقتدار میں لانا عوام کے اعتماد کا ثبوت ہے۔انہوں نے کہا کہ :’’آسام کے عوام کی حمایت سے این ڈی اے تیسری بار ہمنتا بسوا سرما کی قیادت میں حکومت بنانے جا رہی ہے۔ ہم ریاست کے عوام کے بے حد شکر گزار ہیں۔‘‘سونووال نے اس امید کا بھی اظہار کیا کہ آنے والے برسوں میں آسام ملک کی سب سے ترقی یافتہ ریاستوں میں شامل ہوگا۔حلف برداری تقریب سے ایک دن قبل ہمنتا بسوا سرما نے اپنے کابینہ ساتھیوں کے ناموں کا اعلان سوشل میڈیا پلیٹ فارم ایکس پر کیا تھا۔ انہوں نے سینئر بی جے پی ایم ایل اے رنجیت داس Ranjit Das کو آسام اسمبلی کے اسپیکر کے عہدے کیلئے این ڈی اے امیدوار بھی نامزد کیا۔تقریب کے دوران گوہاٹی میں غیر معمولی سکیورٹی انتظامات کئے گئے تھے۔ حکام کے مطابق ایک لاکھ سے زائد افراد نے شرکت کی۔شہر بھر میں پولیس کی متعدد بٹالینز، سینٹرل آرمڈ پولیس فورسز، اسپیشل پروٹیکشن گروپ اور نیشنل سکیورٹی گارڈ کے اہلکار تعینات کئے گئے تھے۔ ٹریفک نظام کو بھی خصوصی طور پر منظم کیا گیا، جبکہ تقریب کے مقام پر سخت نگرانی اور داخلہ کنٹرول نافذ رہا۔
