نئی دہلی،4فروری، سماج نیوز سروس: جامعہ ملیہ اسلامیہ میں تشدد سے متعلق معاملے میں دہلی پولس کو نتائج کا سامنا کرنا پڑا ہے۔ مقامی عدالت نے اس مقدمے میں شرجیل امام، صفورا زرگر، آصف اقبال تنہا اور دیگر 8 ملزمان کو بری کر دیا۔ عدالت نے ہفتہ کو کہا کہ دہلی پولس تشدد کے اصل مجرموں کو پکڑنے میں ناکام رہی ہے۔ عدالت نے کہا کہ پولس نے انہیں بلی کا بکرا بنایا ہوگا۔ استغاثہ پر تنقید کرتے ہوئے ایڈیشنل سیشن جج ارول ورما نے کہا کہ پولس نے من مانی طور پر احتجاج کرنے والے ہجوم میں سے جسے چاہا اٹھا لیا۔ کچھ کو ملزم بنایا گیا اور باقی پولس کے گواہ بن گئے۔ عدالت نے کہا کہ محض احتجاجی مقام پر موجودگی سے ملزم نہیں بن سکتا۔ عدالت نے کہا کہ ایسا لگتا ہے کہ استغاثہ ان (ملزمان) کے پیچھے چلا گیا ہے۔ عدالت نے کہا کہ ان لوگوں کو طویل عرصے تک ٹرائل میں رکھنا ملک کے عدالتی نظام کیلئے اچھی علامت نہیں ہے۔ تاہم عدالت نے محمد الیاس پر فرد جرم عائد کردی۔یہ معاملہ دسمبر 2019 میں جامعہ ملیہ اسلامیہ میں ہوئے تشدد سے متعلق ہے۔ ایف آئی آر میں ہنگامہ آرائی اور غیر قانونی مظاہرے کی دفعات لگائی گئی ہیں۔ شرجیل امام اس کیس میں بری ہونے کے باوجود جیل میں ہی رہیں گے۔ ان کے خلاف 2020 کے شمال مشرقی دہلی فسادات سے متعلق کئی ایف آئی آر بھی درج ہیں۔ ان فسادات کی سازش سے متعلق مقدمات میں اسپیشل کیس نے تنہا اور زرگر کو بھی ملزم بنایا ہے۔دہلی پولس نے 21 اپریل 2020 کو محمد الیاس کے خلاف چارج شیٹ داخل کی۔ 11 دیگر ملزمان کے خلاف ضمنی چارج شیٹ بھی دائر کی گئی۔ کیس میں تیسری سپلیمنٹری چارج شیٹ یکم فروری 2023 کو داخل کی گئی تھی۔ استغاثہ ثابت کرنا چاہتا تھا کہ گواہوں نے بعض تصاویر کی بنیاد پر ملزم کو شناخت کیا تھا۔ جج نے کہا کہ دہلی پولس تازہ ثبوت پیش کرنے میں ناکام رہی ہے۔ عدالت نے نوٹ کیا کہ پولس کے دعوے کی تصدیق کیلئے کوئی عینی شاہد موجود نہیں ہے۔ایف آئی آر میں فسادات اور غیر قانونی اجتماع – آئی پی سی کی دفعہ 143، 147، 148، 149، 186، 353، 332، 333، 308، 427، 435، 323، 341، 120بی اور 34 کے تحت مقدمہ درج کیا گیا ہے۔تاہم، امام اب بھی 2020 کے شمال مشرقی دہلی فسادات سے متعلق اپنے خلاف درج دیگر ایف آئی آر میں زیر حراست رہیں گے۔ امام اور تنہا دونوں اسپیشل سیل کے معاملے میں ملزم ہیں جس میں الزام لگایا گیا ہے کہ 2020 کے شمال مشرقی دہلی فسادات کے پیچھے ایک بڑی سازش تھی۔خیال رہے کہ دہلی پولس نے شرجیل کے خلاف اشتعال انگیز تقاریر کیلئے چارٹ شیٹ داخل کی تھی۔ 2013 میں شرجیل نے جے این یو سے ماڈرن ہسٹری میں پی جی کی ڈگری مکمل کی۔ ان کا تعلق بہار کے جہان آباد ضلع سے ہے۔ ضمانت کی درخواستوں پر سماعت نہ ہونے کی وجہ سے وہ ابھی تک جیل میں ہیں۔
