نئی دہلی، ماحولیات اور جنگلات کے وزیر گوپال رائے نے آج دہلی سکریٹریٹ میں محکمہ جنگلات کے سینئر افسران کے ساتھ ایک اعلیٰ سطحی میٹنگ کی۔ میٹنگ کے بعد گوپال رائے نے کہا کہ 21 فروری کو دہلی سکریٹریٹ میں تمام متعلقہ محکموں؍ ایجنسیوں کے اعلیٰ عہدیداروں کے ساتھ درخت لگانے کی خصوصی مہم کے سلسلے میں ایک میٹنگ ہوگی۔کیجریوال حکومت کے تمام اقدامات کے نتیجے میں دہلی کے اندر گرین کور میں نمایاں اضافہ ہوا ہے۔ اس سمت میں، دہلی حکومت نے شجرکاری مہم کے تحت اس سال تقریباً 43 لاکھ پودے لگانے؍تقسیم کرنے کا ہدف مقرر کیا تھا۔ اب تک 47 لاکھ پودے لگ چکے ہیں. دہلی میں جہاں سال 2013 میں سبزہ رقبہ 20 فیصد تھا وہ کیجریوال حکومت کی کوششوں سے سال 2021 میں بڑھ کر 23.06 فیصد ہو گیا ہے۔ اس کے علاوہ، شہروں کے فی کس جنگلات کے احاطہ کے لحاظ سے دہلی پورے ملک میں نمبر ایک بن گیا ہے۔ گوپال رائے نے مزید کہا کہ محکموں کی طرف سے اب تک تقریباً 47 لاکھ پودے لگائے؍ تقسیم کئے جا چکے ہیں۔ ان میں محکمہ جنگلات کی طرف سے تقریباً 10 لاکھ 80 ہزار، ڈی ڈی اے کی طرف سے 5 لاکھ 47 ہزار، ایم سی ڈی کی طرف سے 5 لاکھ 23 ہزار، محکمہ تعلیم کی طرف سے 2 لاکھ 73 ہزار، ڈی ایس آئی آئی ڈی سی کی طرف سے 42 ہزار، ڈی یو ایس آئی بی کی طرف سے 13 ہزار، پی ڈبلیو ڈی کی طرف سے 3۔لاکھ 86 ہزار، سی پی ڈبلیو ڈی کی طرف سے 30 ہزار، این ڈی ایم سی کی طرف سے 7 لاکھ 57 ہزار، دہلی جل بورڈ کی طرف سے ایک لاکھ 3 ہزار، شمالی ریلوے کی طرف سے 26 ہزار، دہلی کنٹونمنٹ بورڈ کی طرف سے 16 ہزار، این ڈی پی ایل کی طرف سے 12 ہزار اور بی ایس ای ایس کی طرف سے 30 ہزار ہیں۔ اس کے علاوہ تقریباً 8 لاکھ پودے بھی تقسیم کیے گئے ہیں۔ اس دوران گوپال رائے نے محکمہ جنگلات کے افسران کو ہدایت دی کہ وہ محکموں سے درخت لگانے کی تفصیلات حاصل کریں کہ کہاں کہاں پودے لگائے گئے ہیں۔ تمام متعلقہ محکموں کو شجرکاری مہم کے تحت دہلی میں لگائے گئے پودوں کی بقا کی شرح کو جانچنے کے لیے تھرڈ پارٹی آڈٹ کرنے کی بھی ہدایت دی گئی ہیں. دہلی کے لوگوں سے اپیل کرتے ہوئے گوپال رائے نے کہا ہے کہ دہلی کے ماحول کو بہتر بنانے کے لیے ہر کسی کو اپنا حصہ ڈالنا چاہیے۔ یہ مہم نہ صرف دہلی کے ہرے بھرے علاقے میں اضافہ کرے گی بلکہ مستقبل میں آلودگی کے مسئلے سے لڑنے کے لیے روڈ میپ بھی تیار کرے گی۔
