نئی دہلی، صدر دروپدی مرمو نے اتوار کو مختلف ریاستوں اور مرکز کے زیر انتظام علاقوں کے گورنروں کے عہدوں میں ردوبدل کیا۔دریں اثنا، مہاراشٹر کے گورنر بھگت سنگھ کوشیاری اور لداخ کے لیفٹننٹ گورنر رادھا کشن ماتھر نے آج اپنے عہدوں سے استعفیٰ دے دیا۔ صدر جمہوریہ نے ان کے استعفے منظور کر لیے ہیں۔چھتیس گڑھ کی گورنر انسوئیااوئیکی کو منی پور کی ذمہ داری دی گئی ہے اور ان کی جگہ آندھرا پردیش کے گورنر بی بی ہری چرن کو مقرر کیا گیا ہے ۔لیفٹیننٹ جنرل کیولیا تریوکرم پرنائک کو اروناچل پردیش، لکشمن پرساد اچاریہ سکم، سی پی رادھا کرشنن جھارکھنڈ، شیو پرتاپ شکلا ہماچل پردیش، گلاب چندر کٹاریہ آسام اور جسٹس (ریٹائرڈ) ایس عبدالنذیر کو آندھرا پردیش کا گورنر مقرر کیا گیا ہے ۔اسی طرح ایل گنیشن (منی پور) کو ناگالینڈ کا گورنر، فاگو چوہان (بہار) کو میگھالیہ کا، راجندر وشواناتھ ارلیکر (ہماچل پردیش) کو بہار، رمیش بیس (جھارکھنڈ) کو مہاراشٹر کا، بریگیڈیئر بی ڈی مشرا (اروناچل پردیش) کو لداخ کا گورنر بنایا گیا ہے یہ تقرریاں گورنروں کے عہدہ سنبھالنے کی تاریخ سے ہی لاگو ہوں گی۔سپریم کورٹ کے سابق جج جسٹس عبدالنذیرکو آندھراپردیش کا نیا گورنرمقرر کیاگیا ہے ۔جسٹس نذیر 4جنوری 2023کو سبکدوش ہوئے تھے ۔وہ اس تلگوریاست کے موجودہ گورنر وشوابھوشن ہری چندن کے جانشین ہوں گے ۔ جسٹس نذیرکو فروری 2017میں کرناٹک ہائی کورٹ کے جج سے سپریم کورٹ کے جج کے طورپر ترقی دی گئی تھی۔وہ پُٹوسوامی معاملہ، طلاق ثلاثہ معاملہ کے ساتھ ساتھ بابری مسجد معاملہ اور نوٹ بندی معاملہ کی بنچ کا بھی حصہ رہے تھے ۔ صدرجمہوریہ دروپدی مرمو نے جسٹس عبدالنذیرکی تقرری کی منظوری دیدی ہے ۔جسٹس نذیر کی پیدائش کرناٹک کے دکشن کرناٹک کے بولی وائی علاقہ میں 1958کو ہوئی تھی۔انہوں نے منگالورو کے ایس ڈی ایم لا کالج سے قانون کی ڈگری کی تکمیل کے بعد 18فروری 1983میں ایڈوکیٹ کے طورپر اپنا اندراج کروایا تھا۔12مئی 2003کوکرناٹک کے ایڈیشنل جج بنائے جانے سے پہلے انہوں نے کرناٹک ہائی کورٹ میں پریکٹس کی تھی اور بعد ازاں ان کو ترقی دیتے ہوئے سپریم کورٹ کا جج مقرر کیا گیا۔مہاراشٹر کے نئے گورنرکے طورپر رمیش بیس کاتقرر ہوا ہے جوکہ گورنر بھگت سنگھ ہوشیاری کے جانشین ہوں گے ۔ذرائع کے مطابق صدر دروپدی مرمو نے اتوار 12 فروری کو بھگت سنگھ کوشیاری کا استعفیٰ قبول کر لیاہے اور رمیش بیس سمیت 13 ریاستوں اور مرکز کے زیر انتظام علاقوں میں گورنری میں ردوبدل کیا گیا تھا۔رمیش بیس بی جے پی کے تعلق رکھتے ہیں اور مہاراشٹر کے 23 ویں گورنر ہوں گے ۔ اس سے قبل ہندوستان کی 16ویں لوک سبھا میں وہ چھتیس گڑھ کی رائے پور لوک سبھا سیٹ سے ممبر پارلیمنٹ تھے ۔ 2014 کے انتخابات میں انہوں نے بھارتیہ جنتا پارٹی کی جانب سے چھتیس گڑھ کی رائے پور سیٹ سے حصہ لیا تھا۔وہ ریاست چھتیس گڑھ سے ایک مقبول رہنما ہیں جو لگاتار 7 بار جیت کر ایم پی تک پہنچے ہیں۔وہ اٹل بہاری واجپئی حکومت میں کابینہ وزیر کے ساتھ ساتھ تری پورہ اور جھاڑکھنڈ کے بھی گورنر رہے ہیں۔
