دیوبند، بہار کے سابق وزیراعلیٰ کرپوری ٹھاکر کی برسی پر آج سماج وادی پارٹی دفتر پر کارکنان نے انہیں خراج عقید ت پیش کرتے ہوئے موجودہ حالات میں مذہب اور ذات کی سیاست کو ختم کرنے کے لئے سماج وادی پارٹی کے نظریات کو عوام تک پہنچانے کا عہد لیا۔ آج انبالہ روڈ پر واقع سماج وادی پارٹی ضلع دفتر پر پارٹی کارکنان نے بہار کے سابق وزیر اعلیٰ کرپوری ٹھاکر کی برسی پر خراج عقیدت پیش کرتے ہوئے ان کی تصویر پر گل پوشی کی ۔ اس موقع پر ریاست اترپردیش کے سابق وزیر سرفراز خان اور سابق سہارنپور شہر صدر فیصل سلمانی نے کہا کہ پوری زندگی پسماندہ طبقات کے لئے لڑائی لڑنے والے سابق وزیر اعلیٰ بہار کرپوری ٹھاکر نے ہمیشہ بے لوث سماج کی خدمت کی ہے۔ ایسے قدآور لیڈر سے ہمیں سبق لینا چاہئے اور ان کے بتائے ہوئے راستہ کو اختیار کرنا چاہئے تاکہ سماج وادی پارٹی کے نظریات کو مزید مضبوطی مل سکے۔ کیوں کہ موجودہ وقت میں مذہب اور ذات کی سیاست کرکے سماج کو تقسیم کرنے کا کام کیا جارہا ہے ، ایسی صورت میں سماج وادی نظریات سے برابری لائی جاسکتی ہے۔
وجےش شرما اور حسین قریشی نے خراج عقیدت پیش کرتے ہوئے کہا کہ عام آدمی کے لئے کام کرنے والے سابق وزیر اعلیٰ کرپوری ٹھاکر نے زندگی بھر سماج واد کے نظریات کو اختیار رکھا اور اپنی زندگی کے آخری سانس تک سماج واد نظریات کو مضبوط بنانے کا کام کیا۔ صاف سیاست کی طاقت پر وہ 1952سے لگاتار اسمبلی رکن منتخب ہوتے رہے ، انہو ںنے کبھی پیسہ کا لالچ نہیں کیا اور انہوں نے ہمیشہ سادگی اور بے لوث وایمانداری کے ساتھ اپنی زندگی گزاری اور سیاست میں اپنی الگ شناخت بنائی۔ آج ان کے نقش قدم پر چلنا ہی انہیں سچی خراج عقیدت ہوگی۔ انجو رانی نے کہا کہ سبھی کارکنان کو ایسے قدآور لیڈر کے نظریات کو عوام تک پہنچانا چاہئے تاکہ عوام ان سے روبرو ہوکر ان سے سبق حاصل کرسکے۔ خراج عقیدت پیش کرنے والوں میں عبدالغفور، فہد سلیم، جملہ سنگھ، کنور پال، وید پال، جیسوال، ندیم قریشی، وشال یادو، قیوم، رام کمار، محفوظ انصاری وغیرہ موجود رہے۔
