مختلف سڑک حادثوں میں ایک نوجوان کی موت

رضوان سلمانی
دیوبند، دو الگ الگ حادثات میں ایک نوجوان کی موت ، جب کہ ایک شدید طو ر سے زخمی ہوگیا۔ موصولہ اطلاع کے مطابق دیوبند جھبریڑہ روڈ پر واقع مقبرہ پولیس چوکی کے نزدیک موٹر سائیکل سے نیچے گرے ایک لڑکے کی گنے سے بھری ٹریکٹر ٹرالی کے زد میں آنے سے موقع پر ہی موت واقع ہوگئی۔ پولیس نے ٹریکٹر ڈرائیور کو حراست میں لے لیا ہے، جب کہ حادثہ میں جاں بحق ہونے والے لڑکے کے اہل خانہ نے ٹریکٹر ٹرالی ڈرائیور کے خلاف کارروائی کے لئے دیوبند تھانہ میں تحریر دی ہے، گزشتہ دیر رات گاؤں مقبرہ کا رہنے والا اتل اپنے 15سالہ بھتیجے لکی کے ساتھ دیوبند سے بذریعہ موٹر سائیکل گاؤں واپس آرہا تھا ، جب وہ گاؤں کے نزدیک مقبرہ پولیس چوکی کے نزدیک پہنچا تو اسپیڈ بریکر پر موٹر سائیکل بے قابو ہوجانے کی وجہ سے لکی موٹر سائیکل سے زمین پر گرگیا، اس دوران سامنے سے تیز رفتار سے آرہی ٹریکٹر ٹرالی کا پہیہ لکی کے اوپر چڑھ جانے سے اس کی موقع پر ہی موت واقع ہوگئی۔ حالانکہ اس دوران پولیس چوکی نزدیک ہونے کی وجہ سے پولیس فوراً موقع پر پہنچی اور ٹریکٹر ڈرائیور کو حراست میں لے لیا ۔ جاں بحق ہونے والے لکی کے چچا اتل نے بتایا کہ تیز رفتار سے غلط سائڈ سے آرہی ٹریکٹر ٹرالی نے اس کی موٹر سائیکل میں ٹکر ماردی جس کے سبب موٹر سائیکل سے نیچے گرنے پر اس کے بھتیجے لکی کے اوپر پہیہ چڑھ گیا اور اس کی موت واقع ہوگئی۔ اس سلسلہ میں تھانہ انچارج ایچ این سنگھ نے بتایا کہ معاملہ ان کے علم میں ہے اور لاش کو قبضہ میں لے کر پوسٹ مارٹم کے لئے بھیج دیا ہے ۔ انہوں نے بتایا کہ تحقیق کے بعد آگے کی کارروائی عمل میں لائی جائے گی۔ ایک دوسرے سڑک حادثہ میں موٹر سائیکل اور بلٹ کی آمنے سامنے ٹکر ہوجانے کی وجہ سے بلٹ موٹر سائیکل سوار نوجوان شدید طور پر زخمی ہوگیا جس کو ڈاکٹروں نے ابتدائی طبی امداد کے بعد سرکاری اسپتال سے ہائیر سینٹر ریفر کردیا۔ آج محلہ گوجر واڑہ کا باشندہ مہتاب ولد مرتضیٰ اپنی بلٹ موٹر سائیکل سے سانپلہ روڈ پر کسی کام کی غرض سے جارہا تھا کہ اسی درمیان سامنے سے آنے والی بائک سے اس کی ٹکر ہوگئی جس کی وجہ سے بلٹ موٹر سائیکل پر سوار نوجوان مہتاب شدید طور پر زخمی ہوگیا جس کو آس پا س کے لوگوں اور راہ گیروں نے دیوبند کے سرکاری اسپتال میں علاج کے لئے داخل کرایا لیکن ڈاکٹروں نے اس کے زخموں کی نوعیت کے پیش نظر ابتدائی طبی امداد دینے کے بعد ہایئر سینٹر ریفر کردیا۔ اس حادثہ سے متعلق ابھی تک دونوں متأثرین میں سے کسی نے بھی کوتوالی میں تحریر نہیں دی ہے۔ پولیس کا کہنا ہے کہ ابھی تک مذکورہ حادثہ سے متعلق کوئی تحریر موصول نہیں ہوئی ہے ، تحریر ملنے کے بعد کارروائی عمل میں لائی جائے گی۔ وہیںراج مستری کا کام کرنے والے ایک شخص کی لاش چھت پر ملنے سے علاقہ میں سنسنی پھیل گی ، مرنے والے کے گلے پر تیز دھار دار ہتھیار کا نشان ہے ، بتایا جاتا ہے کہ مرنے والے نے گھریلو رنجش کے سبب خودکشی کی ہے ۔ پولیس نے لاش کا پنچ نامہ بھرکر پوسٹ مارٹم کے لئے بھیج دیا ہے۔ موصولہ اطلاع کے مطابق محلہ بیرون کوٹلہ کے نوگزہ پیر کے رہنے والے 36سالہ اسلم ولد اصغر 4بچوں کا باپ ہے ، کسی بات کو لے کر اس کی بیوی کے ساتھ کافی دنوں سے تنازعہ چلا آرہا تھا ، گزشتہ رات بھی میاں بیوی کے درمیان کچھ کہا سنی ہوئی تھی ، کہا سنی کے بعد اسلم گھر سے چلا گیا تھا ۔ صبح کے وقت جب اسلم کی بیوی چھت پر گئی تو اس کے گھر سے ملی دوسری چھت پر اسلم کی خون سے لت پت لاش کو دیکھ کر اس کے ہوش اڑگئے اور اس نے شور شرابہ شروع کردیا، شور شرابہ سن کر آس پاس کے لوگ موقع پر جمع ہوگئے اور انہو ںنے اسلم کو خون سے بھرا دیکھ کر اور پاس ہی چھری پڑی ہونے پر اس واقعہ کی اطلاع فوراً پولیس کو دی ۔اطلاع ملتے ہی فو راً پولیس موقع پر پہنچی اور اس پورے معاملہ کی تفصیلی معلومات حاصل کی ۔ پولیس نے لاش کے پاس سے ایک چھری بھی برآمد کی ہے ۔ اس دوران اسلم کے گھر میں کہرا م مچ گیا ، گھر کے آس پاس بڑی تعداد میں لوگ جمع ہوگئے ۔ موقعۂ نواردات پر پہنچی پولیس نے لاش کو قبضہ میں لے کر اسے پوسٹ مارٹم کے لئے بھیج دیا ہے۔ بتایا جاتا ہے کہ کچھ روز سے اس کے گھر میں رنجش چل رہی تھی ، پڑوسیوں کے مطابق گزشتہ دیر شام بھی اس کے گھر سے چیخ وپکار کی آوازیں سنی گئیں۔
پڑوسیوںکے مطابق اسلم کی شادی 14سال قبل ہوئی تھی اور اس کے 4بچے بھی ہیں ، بتایا جاتا ہے کہ اسلم کا اکثر اپنی بیوی کے ساتھ جھگڑا ہوتا رہتا تھا ، کل بھی اسلم خودکشی کرنے کی کوشش کررہا تھا لیکن لوگوں نے اسے سمجھا بجھاکر روک لیا تھا۔ بتایا جاتا ہے کہ اسلم نے صبح کسی وقت چھت کے راستے پڑوس میں پہنچ کر چھری سے گلا کاٹ کر خودکشی کی ہے ۔ اس سلسلہ میں تھانہ انچارج ایچ این سنگھ نے بتایا کہ لاش کو پوسٹ مارٹم کے لئے بھیج دی گئی ہے ۔ ان کے مطابق یہ معاملہ پہلی نظر میں گھریلو رنجش کے سبب خودکشی کا نظر آرہا ہے ، لیکن پوسٹ مارٹم رپورٹ کے بعد ہی صحیح صورت حال سامنے آئے گی ۔
گھریلو رنجش کے سبب ایک شخص نے گلا کاٹ کر خودکشی کی