محمداقبال
نئی دہلی، دہلی کے معروف دینی ادارہ مدرسہ تعلیم القرآن ،تکیہ کالے خاں،میردرد روڈ، نئی دہلی کے طلبہ کی انجمن کا اختتامی مقابلہ جاتی پروگرام منعقد ہوا۔ پروگرام کی صدارت مدرسہ ہٰذا کے بانی ومہتمم مولانا محمد قاسم نوری قاسمی نے، جبکہ نظامت مولانا جاوید رحیمی نے کی۔ پروگرام چار زمروں پر مشتمل تھا۔ پہلازمرہ تلاوتِ قرآن کریم، دوسرا نعت ومنقبت،تیسرا تقریر و خطابت اور چوتھا انگریزی زبان میں تقریر۔ پہلے زمرے میں بالترتیب محمد سفیان نے اول، محمد صادق نے دوم اورمحمد ارشد سوم پوزیشن حاصل کی۔ دوسرے زمرے میں پہلی پوزیشن محمد اشرف نے دوم محمد یاسین نے اور سوم پوزیشن محمد عرفان نے حاصل کی۔ تیسرے زمرے یعنی تقریر وخطابت میں پہلی پوزیشن محمد استخار نے دوم پوزیشن، محمد راحل نے اور سوم پوزیشن محمد نظرالاسلام نے حاصل کی۔ چوتھے زمرے یعنی انگریزی تقریر میں پہلی پوزیشن محمد ایان نے، دوم پوزیشن عنایت اللہ نے اور سوم پوزیشن محمد دلنواز نے حاصل کی۔ تمام پوزیشن لانے والے طلبہ کو گرانقدر انعامات مہمانان کے ہاتھوں دیے گئے۔ اس کے علاوہ مقابلہ جاتی پروگرام میں حصہ لینے والے تمام طلبہ کو بھی تشجیعی انعامات سے نوازا گیا۔ قبل ازیں مہمانوں اور حکم صاحبان نے مقابلہ جاتی پروگرام میں تمام طلبہ کی بہتر کارکردگی کی بنیادپر اطمینان وخوشی کا اظہار کرتے ہوئے کہاکہ ماشاءاللہ مدرسہ ہٰذا نے بہت ہی کم مدت میں سیکڑوں حفاظ وخطیب دیے ہیں، اس کے لیے مولانا محمد قاسم نوری اور ان کے رفقاءمبارکباد کے مستحق ہیں۔ مدرسہ ہٰذا کے بانی ومہتمم مولانا محمد قاسم نوری قاسمی نے تمام مہمانوں کا شکریہ ادا کیا اور طلبہ سے مخاطب ہوتے ہوئے کہاکہ آپ دوردراز سے تعلیم حاصل کرنے کے لئے آئے ہیں یہ سب اللہ کی توفیق سے ہوا ہے۔ انہوں نے کہاکہ آپ کو بہترین حافظ ہونے کے ساتھ ساتھ عصری علوم بھی حاصل کرنا چاہیے،کیونکہ ملک کے سرکاری شعبوں میں مدارس کے طلبہ کی نمائندگی بہت ہی کم ہے اور یہ مسلمانوں کے لئے نیک فال نہیں ہے۔ آپ سب کو چاہیے کہ علوم دینیہ کے ساتھ ساتھ اعلیٰ عصری علوم بھی پوری تندہی اور توجہ کے ساتھ حاصل کریں ، ڈاکٹر بنیں، آئی اے ایس اور آئی پی ایس بنیں ، یہی حالات اور وقت کا تقاضا ہے۔اس موقع پر مولانا اسلام الدین امام وخطیب فرش والی مسجد اور مولانا عاشق الٰہی نے طلبہ کو نقد رقم بطور انعام دیتے ہوئے خطاب کیا۔ مولانا اسماعیل آزاد نے طلبہ کو نصیحت کرتے ہوئے کہا کہ اپنا قیمتی وقت لا یعنی چیزوں میں ضائع نہ کریں، محنت اور لگن سے دینی تعلیم کے ساتھ دنیاوی تعلیم حاصل کرکے اعلیٰ مقام پر فائز ہوں تاکہ اداروں اور ماں باپ کا نام روشن ہو۔ مولانامحمد اقبال نے طلبہ کو قیمتی نصائح سے نوازا اور محنت و لگن سے تعلیم حاصل کرنے کے لیے طلبہ کو ترغیب بھی دی، مولانا محمد قاسم نوری قاسمی کی دعا پر پروگرام کا اختتام ہوا۔ اس موقع پر مفتی نظر عالم قاسمی، مولانا ہاشم ، مولانا مظہر الدین خان، بھائی شکیل عرف گلو کے علاوہ مدرسہ کے جملہ اسٹاف میں قاری جاوید رشیدی، قاری تہذیب، قاری عبدالحلیم، قاری مطہر ریاض وغیرہ موجود تھے۔
