اورنگ آباد، مسلمانوں کے بچوںکے اندردینی تعلیم وتربیت کا شوق پیدا کرنے ،اپنی نسلوں کو ارتداد سے بچانے،والدین کے اندر احساس ذمہ داری ادا کرنے ،مکاتب کے نظام کو منظم کرنے ،مکاتب دینیہ سے محلے کے بچوں کو جوڑنے و دیگر اہم مقاصد کے پیش نظرجمعیتہ علماءہند کے حکم پر حضرت مولانا حافظ محمد ندیم صدیقی صاحب( صدرجمعیتہ علماءمہا راشٹر) کی ہدایت کے مطابق صوبے بھر میں یکم رجب المرجب سے چلنے والی دینی تعلیمی بیداری مہم کامیاب طریقے پر جاری ہے۔اسی بابت جمعیتہ علماءنائیگاؤں کے زیر اہتمام دینی تعلیمی بیداری مہم کے سلسلہ میں ایک اہم اور ضروری مشورہ بمقام مدینہ مسجد، بعد نماز مغرب، منعقد ہوا۔ جس میں نائیگاؤں کے تمام مساجد کے ائمہ کرام اورجمعیتہ علماءنائیگاؤں کے اراکین وذمہ داران اور دانشور احباب نے کثیرتعداد میں شرکت کی ،مشاورتی نشست کو کامیابی سے ہمکنار کیا۔حافظ عمران کی تلاوت قرآن پاک سے اس مشاورتی نشست کا آغازکیا گیا، مولانا سہیل ندوی جنرل سکریٹری جمعیتہ علماءنائیگاؤں نے سابقہ کارکردگی کوپیش فرمایا۔مفتی عقیل الرحمن صاحب( نائب صدرجمعیتہ علماءضلع اورنگ آباد )نے دینی تعلیمی بیداری مہم کو کامیاب کس طرح کریں ،اس پر تفصیلی تبادلہ خیال کیا گیا، اور نائیگاؤں کے علاوہ قرب جوار کے دیہات میں بھی کام کی ترغیب دلائی ،اسی طرح دینی تعلیمی بورڈ مراٹھواڑہ کے جنرل سکریٹری مولانا عبدالشکور جامعی نے دینی تعلیمی بیداری مہم کی ضرورت واہمیت پر اپنے منفرد لب و لہجہ میں گفتگو ں کی، اور کام کی ترغیب دلاتے ہوئے باقاعدہ کام کو تقسیم فرمایا ،حاضرین کے مشورہ سے دینی تعلیمی بورڈ نائیگاؤں کی کمیٹی تشکیل دی گئی ،اس موقع پر عبدالرؤف انجینئر جنرل سکریٹری جمعیتہ علماءضلع اورنگ آباد ، جناب نور الحمید قریشی بابا بھائی اور حافظ ریاض قریشی موجود تھے۔ اسی اعتبار سے مدرسہ نورالہدیٰ للبنات گلشن کالونی ، نائیگاؤں سے مفتی عقیل الرحمن کی صدارت میں منظم ادارہ دینیات نائیگاؤں مدرسہ عائشہ انعام البنات کی تمام طالبہ کی منظم ریلی نکالی گئی تاکہ کوئی بچہ ہمارے مکتب سے دور نہ رہے، الحمد للہ پوری بستی میں گلی گلی یہ ریلی گشت کرتی رہی اور آخر میں مدرسہ نورالہدیٰ للبنات آکریہ ریلی مولانا عبدالعظیم اشاعتی صدرجمعیتہ علماءنائیگاؤں کی دعاءاختتام پذیر ہوئی۔ اس ریلی کو کامیاب بنانے میں مولانا شاکر صاحب بیتی ،مولانا جاوید ندوی، عبدالقیوم عالمگیری اور ان کے جمیع اساتذہ اور اسی طرح ادارہ دینیات نائیگاؤں کے تمام اساتذہ نے بھر پور کوشش کی اور اس ریلی کو کامیاب بنانے میں اہم رول ادا کیا۔اسی طرح بروز جمعرات بوقت صبح ۸بجے، بمقام جامعہ اسلامیہ انعام العلوم نائیگاؤں اورنگ آباد سے مولانا نعیم ندوی ناظم انعام العلوم کی صدارت میں جامعہ انعام العلوم کے شعبۂ دینیات کے طلبہ اور منظم ادارہ دینیات نائیگاؤں کے طلبہ کی منظم طریقے پر بڑی ریلی نکالی گئی جس میں تقریباً 500طلباءنے شرکت کی اس وقت پورے مہاراشٹر میں حافظ محمد ندیم صدیقی صدرجمعیتہ علماءمہاراشٹر کے ایماءپر ایک ماہ دینی تعلیمی بیداری مہم منائی جارہی ہیں ، اس سلسلہ کو آگے بڑھانے کے لئے تعلیمی بیداری ریلیاں کا انعقاد کیا گیا ہے۔
