نئی دہلی، ملک کی معروف طبّی تنظیم ’ورلڈ یونانی فاؤ نڈیشن‘ کی جانب سے ’دوئم عالمی یونانی کانگریس‘ مع آیوش ہیلتھ میلہ اختتام پذیرہوا۔کانفرنس کی افتتاحی تقریب میں مہمان خصوصی کی حیثیت سے شری اجیت ایم۔ شرن (سابق سکریٹری، وزارت آیوش حکومت ہند) شریک تھے جبکہ صدر مجلس کی حیثیت سے پروفیسر شکیل احمد رومشو (وائس چانسلر اسلامک یونیورسٹی آف سائنس اینڈ ٹیکنالوجی، کشمیر) اور مہمان ذی وقار کی حیثیّت سے ڈاکٹر ڈی۔ سی۔ کٹوچ (سینئر سی۔ ایم۔ او، سی جی ایج ایس، حکومت ہند) شامل تھے کلیدی مقرّر کی حیثیت سے طبّی جہاں کی معروف شخصیّت پروفیسرسیّد ظلّ الرحمٰن نے خصوصی خطاب فرمایا۔ تنظیم کے قومی صدر اور پروگرام کے کنوینر حکیم محسن دہلوی نے اپنے بیان میں ورلڈ یونانی فاؤ نڈیشن کے اغراض و مقاصد سے اہل محفل کو روشناش کرایا۔ کانفرنس میں ملک و بیرون ملک کے حاملین و شائقین طِب نے کثیر تعداد میں شرکت کی۔سائنٹفک سیشن کے تحت باضابطہ تین روزہ سیمینار کا انعقاد ہوا جس میں مختلف اہم عنوان کے تحت علمی و فنّی موضوعات پر مشتمل ماہر فن مقرّرین، اعلیٰ شخصیّات اور دانشورانِ طِب کے نہایت مفید، کارآمد اور معلومات افزاءبیانات ہوئے جن سے اہلیانِ طِب خوب مستفیض ہوئے۔ تین روزہ پروگرام کے آغاز سے اختتام تک مختلف طبّی تنظیموں کے ذمّہ داران کے علاوہ یونانی ڈرگس مینوفیکچررس ایسو سی ایشن (اُڈما) کے عہدیداران اور ذمّہ داران نے بڑھ چڑھ کر حصہ لیا۔ جن میں محمّد عارف، مقبول حسن، محمّد جلیس، حکیم ارباب الدّین، پرویز احمد خاں، محمّد نوشاد، ڈاکٹر مطیع اللہ مجید، سیّد منیر عظمت، حکیم اعجاز احمد اعجازی، حکیم عزیر بقائی اور کاشف ذکائی کے نام قابلِ ذکر ہیں۔
