راہل گاندھی کی پارلیمنٹ رکنیت منسوخی کے خلاف کانگریس کا ملک گیر احتجاج

نئی دہلی 26 مارچ

شعیب رضا فاطمی

کانگریس نے جہاں ہفتہ اور اتوار کو   ملک بھر میں حکومت کے خلاف احتجاج کرتے ہوئے راہل گاندھی کی لوک سبھا رکنیت منسوخ کئے جانے کا مسئلہ اٹھایا، وہیں اس نے اتوار کو دہلی میں مہاتما گاندھی کی سمادھی  راج گھاٹ اور تمام ضلعی ہیڈکوارٹر پر ایک روزہ ستیہ گرہ بھی کیا .

پارٹی نے ہفتہ کو کیرالہ کے وائناڈ میں یوم سیاہ کے طور پر منایا۔ کئی شہروں میں سڑکیں بلاک اور احتجاجی مظاہرے کیے گئے۔اس ملک گیر احتجاج کی پوری کمان کانگریس کے صدر ملکارجن کھڑگے اور جنرل سکریٹری پرینکا واڈرا نے سنبھال رکھی ہے . اتوار کے روز صدر کانگریس ملکارجن کھرگے اور  جنرل سکریٹری پرینکا واڈرا نے راج گھاٹ پر دھرنے میں حصہ لیا اور دونوں لیڈروں نے بی جے پی کو آڑے ہاتھوں لیا.

کانگریس ہیڈ کوارٹر سے تمام ریاستی اکائیوں کو اتوار کو صبح 10 بجے سے شام 5 بجے تک ضلع ہیڈکوارٹر پر گاندھی مجسمہ کے سامنے ستیہ گرہ کرنے کی ہدایت دی گئی ہے۔

کانگریس کے سابق صدر راہل گاندھی نے کہا کہ پارلیمنٹ میں رہو یا باہر جمہوریت کے لیے لڑتے رہو انہوں نے مزید کہا کہ وہ ملک میں جمہوریت کے تحفظ کے لیے لڑتے رہیں گے چاہے انہیں تاحیات پارلیمنٹ سے نااہل کیا جائے یا جیل بھیج دیا جائے۔ کانگریس لیڈر نے کہا کہ میں ڈرنے والا نہیں ہوں اور سوال اٹھاتا رہوں گا۔

راہول گاندھی نے ہفتہ کو میڈیا سے کہا کہ مجھے نااہل قرار دیا گیا ہے کیونکہ وزیر اعظم پارلیمنٹ میں اڈانی مسئلہ پر میری اگلی تقریر سے خوفزدہ تھے۔ یہ سارا کھیل اس معاملے سے لوگوں کی توجہ ہٹانے اور اس پر حکومت کی گھبراہٹ کا ہے۔ لیکن، میں پارلیمنٹ میں ہوں یا باہر، میں یہ سوال پوچھتا رہوں گا کہ مودی اور اڈانی کے درمیان کیا رشتہ ہے۔ اڈانی کی شیل کمپنیوں میں کس کے 20,000 کروڑ روپے لگائے گئے ہیں؟

ہفتہ کو ممبئی اور مہاراشٹر کے دیگر شہروں میں کانگریس کارکنوں نے مظاہرہ کیا۔ اس کے جواب میں بی جے پی بھی سڑکوں پر آگئی اور دیگر پسماندہ طبقات او بی سی کی توہین کرنے پر راہول گاندھی سے معافی مانگنے کا مطالبہ کیا۔ راہل نے 2019 میں ایک انتخابی میٹنگ کے دوران مودی کنیت پر تبصرہ کیا تھا۔ راہول کی حمایت میں کانگریس کارکنوں نے ممبئی سے ملحقہ کلیان قصبے میں دوپہر کو ریلوے اسٹیشن کے قریب ‘راستہ روکو’ دھرنا دیا۔ پولیس نے انہیں منتشر کر کے سڑک کو ٹریفک کے لیے کلیئر کر دیا۔

پلے کارڈز اور بینرز اٹھائے ہوئے کانگریس کارکن تھانے میں بی آر امبیڈکر کے مجسمہ کے پاس جمع ہوئے، جس کی قیادت کانگریس لیڈر وکرانت چوان کر رہے تھے۔ انہوں نے بی جے پی اور وزیر اعظم نریندر مودی کے خلاف نعرے لگائے۔ این سی پی نے کئی مقامات پر بینر بھی لگائے کہ ملک انتقامی سیاست کو برداشت نہیں کرے گا۔ بینرز پر بھارت جوڑو یاترا کے دوران راہل گاندھی کی بڑی تصاویر ہیں۔

ساتھ ہی بھارتیہ جنتا پارٹی راہول گاندھی سے معافی مانگنے پر بضد ہے۔ مہاراشٹر سمیت دیگر ریاستوں میں بی جے پی لیڈروں اور کارکنوں نے راہول گاندھی کے خلاف احتجاج کیا۔ مہاراشٹر میں، پارٹی کے سابق میئر ملند پاٹنکر نے احتجاج کی قیادت کی، جس میں انہوں نے کہا کہ راہول گاندھی کو ہتک عزت کے لیے جیل جانا چاہیے۔

بی جے پی مہاراشٹر یونٹ کے صدر چندرکانت باونکولے نے کہا کہ ملک او بی سی کی توہین برداشت نہیں کرے گا۔ راہل گاندھی کو او بی سی سے معافی مانگنی چاہئے۔ ریاستی بی جے پی لیڈران بشمول منگل پربھات لودھا بھی احتجاج میں شامل ہوئے۔ کانگریس نے گاندھی کو ہتک عزت کے مقدمے میں دو سال قید کی سزا سنائے جانے اور اس کے بعد لوک سبھا سے نااہل قرار دیے جانے کے خلاف پونے میں احتجاج کیا۔

لوک سبھا سے پارٹی کے سابق صدر راہول گاندھی کی نااہلی کے خلاف ہفتہ کو مغربی بنگال، مہاراشٹرا اور آسام میں کانگریس کارکنوں نے احتجاج کیا۔ مغربی بنگال کے دارالحکومت کولکتہ کے ہزارہ علاقے میں احتجاجی کارکن آشوتوش مکھرجی روڈ بلاک کر رہے ہیں۔ انہوں نے بھارتیہ جنتا پارٹی (بی جے پی) کے خلاف نعرے لگائے، اس پر "انتقام کی سیاست” کھیلنے اور "جمہوریت کو دبانے” کی کوشش کا الزام لگایا۔

یوتھ کانگریس کے پچاس کارکنوں کو کولکتہ میں راج بھون کے گیٹ کے پاس دھرنا دیتے ہوئے دیکھا گیا۔ ان کارکنوں نے پلے کارڈ اٹھا رکھے تھے جن پر راہل کی نااہلی کی مذمت کے پیغامات درج تھے۔ پولیس کے مطابق کئی مظاہرین کو گاڑیوں میں لاد کر لال بازار علاقے میں کولکتہ پولیس ہیڈکوارٹر لے جایا گیا۔ ایک اہلکار نے بتایا کہ کئی مظاہرین کو مختصر وقت کے لیے حراست میں لیا گیا اور پھر بعد میں چھوڑ دیا گیا۔ کانگریس کارکنوں نے مغربی بنگال کے کئی دیگر اضلاع بشمول مرشد آباد، بردھمان ایسٹ، بردھمان ویسٹ اور جلپائی گوڑی میں بھی زبردست احتجاج کیا