نئی دہلی ، رمضان المبارک کا پاک مہینہ سایہ فگن ہے ،ذات خدا وندی کی طرف سے بے شمار رحمتیں برکتیں نازل کی جا رہی ہیں، بندگان خدا اپنے رب کی عبادت و ریاضت میں مصروف ہیں، اسی درمیان نماز تراویح میں قرآن پاک مکمل ہونے کا سلسلہ بھی جاری ہے۔ گزشتہ شب چوہان بانگر گلی نمبر آٹھ میں حافظ محمد اویس ابن محمد اسلم نے 12 روزہ تراویح میں قرآن کریم مکمل کیا جن کے پیچھے مولانا فیضان احمد ندوی نے سماعت کا فریضہ انجام دیا۔ بعد نماز تراویح مزکورہ مقام پر ایک نورانی تقریب منعقد ہوئی جس میں بلال مسجد چوہان بانگر کے امام و خطیب مولانا وسیم احمد قاسمی نے فضیلت رمضان اور اہمیت قرآن پر ایمان افروز خطاب کرتے ہوئے کہا کہ قرآن پاک بنی نوع انسان کے لئے دستور حیات ہے جس نے اس کے مطابق زندگی گزاری وہ فلاح پا گیا اور جس نے اس سے روگردانی کی وہ دنیا میں بھی ناکام ہوا اور آخرت میں بھی۔ مولانا نے کہا کہ دنیا کے جملہ علوم، علومِ دینیہ کے سامنے ہیچ ہیں، علم دین انسان کو انسان بنا کر تخلیق کائنات کے فلسفے سے آگاہ کرتا ہے وہ ہمیں جہاں حیا، پاک دامنی، معاملہ فہمی کا درس دیتا ہے وہیں معاشرت کے طریقے بھے سکھا تا ہے۔
مولانا نے کہا کہ اگر دنیا و آخرت کی کامیابی چاہتے ہو تو اپنی نسلوں کو قرآن کریم سے وابستہ کرنا ہوگا، ان کے ایمان اور عقائد کی حفاظت کرنی ہوگی۔ انہوں نے کہا کہ موجودہ دور بہت بڑے فتنہ کا ہے، ہمیں اس کی فتنہ سامانیوں سے خود بھی بچنا ہے اور اپنی نسلوں کو بھی بچانا ہے، خصوصاً ان بچیوں پر زیادہ دھیان دینا ہیں جو تلاش معاش اور حصول علم کے لئے گھروں سے باہر نکل کر مخلوط نظام کا حصہ بنتی ہیں اور وہاں موجود ایمانی قزاقوں کے چنگل میں پھنس کر ارتداد کی دہلیز تک پہنچ جاتی ہیں۔ مولانا موصوف کی دعا پر ہی تقریب اختتام پذیر ہوئی۔ بعد ازاں مصلیان کی جانب سے حفاظ کے حضور ہدیہ پیش کیا گیا، حافظ اویس کے والد نے انکے استاد قاری محمد عمران کو خصوصی ہدیہ پیش کرکے ان کا اعزاز و اکرام کیا اور منتظمین نے حاضرین کے درمیان تبرکات تقسیم کئے۔
