نئی دہلی : دہلی اسٹیٹ حج کمیٹی کی جانب سے گذشتہ دنوں فراہم کی گئی اطلاع کے مطابق آج5؍اپریل2023ء صبح10بجے سے ترکمان گیٹ پر واقع دہلی اسٹیٹ حج کمیٹی (حج منزل) میں حج بیت اللہ 023 2کی ادائیگی کے لیے منتخب عازمین کو طبی جانچ سے متعلق میڈیکل سر ٹیفکیٹ جاری کرنے کے لیے دہلی سرکارکے محکمہ صحت کے ڈاکٹروں پر مشتمل میڈیکل کیمپ نے کام کرنا شروع کردیا ہے۔ آج پہلے ہی دن دہلی کے مختلف اضلاع اور علاقوں کے کل118عازمین کی طبی جانچ کی گئی اور انہیںمیڈیکل سرٹیفکیٹ جاری کیا گیا۔ آج صبح کیمپ کے افتتاح کے بعددہلی اسٹیٹ حج کمیٹی کی چیئرپرسن محترمہ کوثر جہاں، ایگزیکٹو آفیسر جناب اشفاق احمد عارفی اور ڈپٹی ایگزیکٹو آفیسرجناب محسن علی نے میڈیکل کیمپ کا معائنہ کیا۔ اس موقع پر چیئرپرسن محترمہ کوثر جہاں نے عازمین حج سے ملاقات کی اور انہیں مبارکباد پیش کرتے ہوے آئندہ حج بیت اللہ کی روانگی تک انہیں ہر طرح کی بہتر سے بہتر سہولیات فراہم کرنے کی یقین دہانی کرائی۔ حج کمیٹی سے جاری اطلاع کے مطابق عازمین حج سے گذاش کی گئی ہے کہ حج منزل میں میڈیکل سرٹیفکیٹ بنوانے کے لیے آنے سے پہلے کسی بھی لیب سے CBC, Random Sugar Testاور Chest X-ray کرواکر رپورٹ کے ساتھ حج منزل طبی کیمپ میںآئیں۔ نیز50سال کی عمر سے اوپر وکے عازمین اور کسی بھی عمر کے ایسے عازمین جنہیں دل کی کوئی بیماری ہویاسوگر کی سطح زیادہ ہوتووہ اپنی ECGجانچ بھی کروائیں اور اس کی رپورٹ بھی ساتھ لے کر آئیں۔ممبر حج کمیٹی جناب محمد سعد کی کوششوں سے 06؍اپریل سے حج کمیٹی میں موبائل وین لیب کا بھی اہتمام کیا گیا ہے جس میںمذکورہ ٹیسٹ رعایتی چارج پرکیے جائیں گے۔ دوسری جانب حج کمیٹی کے ممبر اور سیلم پور اسمبلی حلقہ سے ممبر اسمبلی جناب عبدالرحمٰن نے عازمین حج کو طبی جانچ اور سرٹیفیکٹ سے متعلق درپیش مسائل اور مشکلات کے حل کے لیے اپنی ذاتی کوششوں سے شاستری پارک میں واقع جگ پرویش اسپتال میںبھی عازمین حج کی طبی جانچ کا اہتمام کیا ہے۔آج صبح جناب عبدالرحمن صاحب نے اور ان کے رضاکاروں نے ذاتی طور پرعازمین حج کو فراہم کی جارہی طبی سہولیات کا جائزہ لیا اور اسے آئندہ جاری رکھنے کی یقین دہانی کرائی۔ حج کمیٹی میں آج ایک خصوصی میٹنگ کا انعقاد کیاگیا جس میںچیئرپرسن محترمہ کوثر جہاں کے علاوہ ممبران حج کمیٹی محترمہ نازیہ دانش (کونسلر) اور جناب محمد سعد نے بھی شرکت کی۔ حج بیت اللہ2023کے لیے حج پروازوں کا سلسلہ21؍مئی2023 سے شروع ہونے کا امکان ہے ۔ اس لیے دہلی اسٹیٹ حج کمیٹی نے صوبہ دہلی کے عازمین حج کی تربیت کے لیے آج اپنی خصوصی میٹنگ میں 10حج ٹرینرزکا بھی انتخاب کیا۔ حج کمیٹی کی جانب سے عازمین کی ٹریننگ کا سلسلہ عید کے فوراً بعد شروع ہو جائے گا۔ جس کے تحت پہلے مرحلے میں حج کمیٹی کے دفتر میںعلاقہ وار حاجیو کی ٹریننگ کا انعقاد کیا جائے گا۔ جبکہ دوسرے مرحلے میںحج کمیٹی کے منتخب کردہ 10ٹرینرز پور ی دہلی کے مختلف علاقوں کے عازمین حج کے لیے ٹریننگ کیمپ کا انعقاد کریں گے۔ حج کمیٹی کی چیئرپرسن محترمہ کوثر جہاں کی خصوصی التزام کے تحت اس سال ٹریننگ کیمپ میں تمام عازمین کو حج سے متعلق اہم اور ضروری اشیاء پر مشتمل ایک کٹ بھی فراہم کی جائے گی۔
