نوئیڈا، ملک بھر میں کورونا وائرس کے معاملوں میں اضافہ کے درمیان نوئیڈا میں بھی معاملوں میں تیزی نظر آ رہی ہے۔ جس کے پیش نظر یہاں نئی رہنما ہدایات جاری کی گئی ہیں۔ رپورٹ کے مطابق اسکول، کالج، دفاتر اور گنجان مقامات پر ماسک لگانا لازمی قرار دیا گیا ہے۔جاری کردہ رہنما ہدایات کے مطابق اسکولوں اور دفاتر میں کورونا کے اصولوں پر عمل کرنا لازمی ہوگا۔ تمام مقامات پر ماسک، سینیٹائزر اور سوشل ڈسٹنسنگ پر عمل کیا جائے گا۔ دفاتر میں داخلہ سے قبل تھرمل اسکریننگ، دروازے، ریلنگ، لفٹ اور پارکنگ میں سینیٹائزر کا انتظام کرنا ہوگا۔رہنما ہدایات کے مطابق، اگر سردی، بخار کی علامات ہیں تو گھر میں قرنطینہ میں رہنے اور کووڈ ٹیسٹ کروانے کی ہدایت دی گئی ہے۔ اس کے علاوہ کہا گیا ہے کہ اسکولوں اور کالجوں میں بچوں اور طلبہ کو ماسک پہننے اور سماجی دوری پر عمل کرنے کا پابند بنایا جائے۔ بچوں کو ان کے درمیان کافی فاصلہ رکھتے ہوئے کلاس میں بٹھایا جائے۔ اسکولوں میں داخل ہونے سے پہلے تھرمل اسکریننگ کی جائے۔ اسکولوں اور کالجوں کے داخلی راستوں پر تھرمل اسکریننگ کی جائے۔ اگر کسی بچے میں کووڈ کی علامات ظاہر ہوں تو اسے اسکول اور کالج نہ بھیجا جائے۔اسپتالوں میں بھی جاری کردہ رہنما خطوط کے مطابق ماسک سینیٹائزر اور سماجی دوری پر عمل کیا جائے۔ صفائی کو مضبوط کیا جائے۔ ماسک کے بغیر داخلہ نہیں ہونا چاہیے۔ نسخہ کاؤنٹر، چیک کاؤنٹر اور ادویات کی تقسیم کے مرکز پر سماجی دوری کی پیروی کی جائے۔ کووڈ کے بارے میں آگاہی پیدا کرنے کے لیے تشہیر کی جانی چاہیے۔ اس کے ساتھ ساتھ پرہجوم جگہوں، بازاروں، منڈیوں اور پرہجوم علاقوں میں کووڈ پروٹوکول پر عمل کیا جائے۔ بوڑھے اور بچے بھیڑ والی جگہوں پر نہ جائیں۔ گردے، دل، جگر کی شوگر اور سانس کی بیماریوں کے مریض باہر نہ نکلیں، اگر جائیں تو ماسک کا استعمال کریں۔ عوامی مقامات پر کوڑا کرکٹ نہ پھینکیں۔ کووڈ پروٹوکول پر عمل کریں۔
