نئی دہلی 16اپریل :نئی دہلی اور پرانی دہلی کی سرحد پر واقع تاریخی رام لیلا میدان سے متصل حج منزل میں ان دنوںایک بار پھر رونق دوبالا ہو گئی ہے ۔جہاں حج 2023 آپریشن کا آغاز ہو چکا ہے۔تمام عازمین حج نے اپنا فارم پر کر دیا ہے اور پہلی فہرست جاری بھی ہو چکی ہے ۔اب دوسرے مرحلے میں یکم مئی سے 10مئی تک حجاج کرام کے لئے حج منزل میں حجاج کرام کی تربیت کا اہتمام کیا جائے گا جس کے تحت دہلی کو دس زون میں تقسیم کر کے ہر زون کے لئے ایک ٹرینر کا انتخاب کیا گیا ہے اور فی الوقت ان تمام ٹرینر کی ٹریننگ ہو رہی ہے ۔دہلی حج کمیٹی کے ایکزیکیوٹیو آفیسر اشفاق عارفی کے مطابق وزارت اقلیتی امور اور شہری ہوابازی کے توسط سے حج چارٹرڈ فلائٹ کے لئے جاری ٹینڈر کو بھی مکمل کر لیا گیا ہے اور اس کے مطابق دہلی سے سعودیہ ائیر لائنس کے ذریعہ حجاج کرام 21مئی سے 6جون تک پرواز کرینگے ۔
