پولس نے 25ہزار روپے کے انعامی بدمعاش کو گرفتار کیا

دیوبند،   دیوبند پولیس نے دیوبند تحصیل کے گائوں مانکی میں واقع اینٹ بھٹہ کے قریب سے 25ہزار روپے کے انعامی اور پولیس کومطلوب بدمعاش کو غیرقانونی اسلحہ کے ساتھ گرفتار کیا ہے، ملزم کے خلاف مختلف تھانوں میں فریب دہی سمیت اسلحہ ایکٹ اور فرضی دستاویزات تیار کرنے کے مقدمات درج ہیں ۔ دیوبند کو توالی انچارج ایچ این سنگھ نے بتایا کہ ملزم تھانہ جنک پوری کی جانب سے اعلان شدہ مجرم ہے ۔ انہوں نے بتایا کہ چیکنگ کے دوران ملزم کو گرفتار کیا گیا ، پولیس نے اس کے پاس سے غیرقانونی طمنچہ اور دو کارآمد کارتوس برآمد کئے ہیں ۔ کوتوالی انچارج نے بتایا کہ مانکی گائوں کا باشندہ گلشیر اسلحہ ایکٹ اور فرضی دستاویز تیار کرنے سمیت مختلف مقدمات میں مطلوب اور 25ہزار روپے کا انعامی بدمعاش ہے، گزشتہ روز مخبر کی اطلاع پر پولیس نے کارروائی کرتے ہوئے گلشیر کو اینٹ بھٹہ کے پاس گھیر لیا ، گلشیر نے پولیس کو دیکھ کر فرار ہونے کی کوشش کی لیکن پولیس ٹیم نے گھیرا بندی کرتے ہوئے اس کو اپنی حراست میں لے لیا ، پولیس کا کہنا ہے کہ تلاشی کے دوران ملزم کے پاس سے ایک غیرقانونی طمنچہ اور دو کارتوس برآمد ہوئے ہیں۔ مختلف دفعات میں کارروائی کرتے ہوئے پولیس نے انعامی بدمعاش کو جیل بھیج دیا۔ دوسرے واقعہ میں پولیس نے چیکنگ کے دوران ایک موٹر سائیکل چور کو گرفتار کیا ہے جس کے قبضہ سے کچھ دن قبل چوری ہوئی موٹر سائیکل برآمد ہوئی ہے ، ملزم سے پوچھ تاچھ کرنے کے بعد پولیس نے رپورٹ درج کرکے اسے جیل بھیج دیا ۔ دیوبند کوتوال ایچ این سنگھ کی قیادت میں پولیس ٹیم یونین تراہے کے قریب موٹر سائیکلوں کی چیکنگ کررہی تھی ، اسی دوران پولیس نے ایک موٹر سائیکل سوار کو رکنے کا اشارہ کیا ، لیکن وہ پولیس کو دیکھ کر فرار ہونے لگا جس کو کچھ دوری پر ہی پولیس نے حراست میں لے لیا، پولیس کے مطابق گرفت میں لیا گیا ملزم علاقہ کے گائوں دھیانہ کا رہنے والا اودت عرف پادا ہے جس کے قبضہ سے چوری ایک موٹر سائیکل برآمد ہوئی ہے ۔ پولیس کے مطابق یہ بائک مظفرنگر کے مصطفی باغ کے رہنے والے انکت کمار کی ہے ، انکت کمار کچھ دن قبل دیوبند کسی کام سے آیا تھا تبھی اس کی بائک چوری ہوئی تھی ۔ انکت نے دیوبند کوتوالی میں رپورٹ درج کرائی ہوئی ہے ، پولیس نے اودت کو جیل بھیج دیا۔ پولیس افسران کا کہنا ہے کہ میونسپل بورڈ کے انتخابات قریب ہیں ، ایسے میں بدمعاشوں ، جرائم پیشہ افراد اور شرپسند عناصر کو جیل رسید کیا جارہا ہے ۔ پولیس کا کہنا ہے کہ میونسپل بورڈ الیکشن کے مدنظر پولیس انتظامیہ پوری طرح مستعد ہے اور شرپسند عناصر کی حرکات وسکنات پر مسلسل نظر رکھی جارہی ہے، پولیس افسران نے انتباہ دیا کہ علاقہ کا ماحول خراب کرنے والوں کو کسی بھی قیمت پر بخشا نہیں جائے گا۔