ترواننت پورم: وزیر اعظم نریندر مودی دو روزہ دورے پر کیرالہ میں موجود ہیں۔ دریں اثنا، انہوں نے منگل (25 اپریل) کو صبح 11:10بجے ترواننت پورم سینٹرل اسٹیشن سے ترواننت پورم اور کاسرگوڈ کے درمیان ریاست کی پہلی وندے بھارت ٹرین کو ہری جھنڈی دکھائی۔وزیر اعظم کے دفتر (پی ایم او) کے مطابق یہ ٹرین 11 اضلاع سے گزرے گی، جن میں ترواننت پورم، کولم، کوٹائم، ایرناکولم، تھریسور، پالکاڈ، پٹھانمتھیٹا، ملاپورم، کوزی کوڈ، کنور اور کاسرگوڈ شامل ہیں۔پی ایم مودی آج صبح ہی ترواننت پورم پہنچے تھے۔ یہاں وزیراعظم کا پرتپاک استقبال کیا گیا۔ یہاں پہنچ کر انہوں نے روڈ شو کر کے لوگوں کا استقبال بھی کیا۔ اس کے بعد وہ سینٹرل ریلوے اسٹیشن کے لیے روانہ ہو گئے۔وندے بھارت ٹرین کو جھنڈی دکھا کر روانہ کرنے کے بعد وزیر اعظم نریندر مودی نے ترواننت پورم میں ڈیجیٹل سائنس پارک کا سنگ بنیاد رکھا۔ انہوں نے ترواننت پورم میں مختلف ترقیاتی منصوبوں کا بھی افتتاح کیا۔ریلوے اسٹیشن کے پلیٹ فارم 1 سے وندے بھارت ایکسپریس کو ہری جھنڈی دکھانے سے پہلے پی ایم مودی نے ٹرین کے ایک ڈبے کے اندر اسکولی بچوں کے ایک گروپ سے بات چیت بھی کی۔ کیرالہ کے گورنر عارف محمد خان، وزیر اعلیٰ پنارائی وجین اور کانگریس کے رکن پارلیمنٹ ششی تھرور بھی وزیر اعظم کے ساتھ موجود تھے۔ اس دوران بچوں نے مودی کو وندے بھارت ٹرین کی اپنی پینٹنگز اور خاکے دکھائے۔پی ایم کو ٹرین کو ہری جھنڈی دکھاتے دیکھ کر دوسری طرف کے پلیٹ فارم پر بھی سینکڑوں لوگ جمع ہو گئے۔ وندے بھارت ایکسپریس ریاستی دارالحکومت کو کیرالہ کے شمالی ترین ضلع کاسرگوڈ سے جوڑے گی۔ پی ایم مودی کے دورے کے لیے ریاست میں سخت حفاظتی انتظامات کیے گئے تھے۔
