پٹنہ، 27 مئی، 2025 وزیر اعلیٰ نتیش کمار نے بہار میوزیم اور پٹنہ میوزیم کو جوڑنے والی زیر تعمیر ٹنل کا معائنہ کیا اور تعمیراتی کام کو جلد از جلد بہتر انداز میں مکمل کرنے کی ہدایت دی۔
وزیر اعلیٰ نے بہار میوزیم کے قریب ٹنل کی تعمیر کے کام کی پیش رفت کی جانکاری لی۔ بہار میوزیم کے ڈائرکٹر جنرل انجنی کمار سنگھ نے وزیر اعلیٰ کو ٹنل کے ذریعے بہار میوزیم میں داخلے کے انتظامات، پارکنگ، سیاحوں کو دستیاب دیگر سہولیات وغیرہ کے بارے میں تفصیلی جانکاری دی۔افسران نے بتایا کہ بہار میوزیم اور پٹنہ میوزیم کو جوڑنے والی یہ سرنگ تقریباً ڈیڑھ کلومیٹر طویل اور 8 میٹر چوڑی ہوگی۔ اسے زمین سے 15 میٹر نیچے بنایا جا رہا ہے۔
معائنہ کے دوران وزیر اعلیٰ نے افسران کو ہدایت دی کہ ٹنل کی تعمیر کا کام جلد مکمل کیا جائے، تاکہ بہار میوزیم اور پٹنہ میوزیم کو دیکھنے والے آسانی سے ایک جگہ سے دوسری جگہ جاکر نمائش کا مشاہدہ کرسکیں۔ انہوں نے کہا کہ ٹنل کو بہتر انداز میںتعمیر کرائیں تاکہ الیکٹرک گاڑیوں کے ساتھ ساتھ پیدل چلنے والے سیاح آسانی سے پٹنہ میوزیم اور بہار میوزیم تک آمدو رفت کرسکیں۔ بہار میوزیم بین الاقوامی سطح کا بنایا گیا ہے۔ بڑی تعداد میں سیاح پٹنہ میوزیم اور بہار میوزیم آتے رہتے ہیں۔ پٹنہ میوزیم کی توسیع اور اپ گریڈیشن کا کام بہتر طریقے سے کیا جا رہا ہے۔ پٹنہ میوزیم اور بہار میوزیم کے درمیان سرنگ کی تعمیر کا کام مکمل ہونے کے بعد سیاحوں کی تعداد میں مزید اضافہ ہوگا۔ سیاحوں کی تعداد کو مدنظر رکھتے ہوئے پارکنگ اور دیگر سہولیات کے مناسب انتظامات کریں۔
اس کے بعد وزیر اعلیٰ نے پٹنہ میوزیم اور اس کے توسیعی کام کا بھی معائنہ کیا۔ اس دوران وزیر اعلیٰ نے پٹنہ میوزیم کے مختلف حصوں بشمول نو تعمیر شدہ آڈیٹوریم، کلیکشن اسٹور، گنگا گیلری کے اپ گریڈیشن اور توسیعی کام کا قریب سے معائنہ کیا۔ معائنہ کے دوران وزیر اعلیٰ نے کہا کہ جو حصہ بنایا گیا ہے وہ اچھی طرح سے تعمیر کیا گیا ہے اور جو باقی رہ گیا ہے اسے بھی بہتر انداز میں جلد مکمل کریں۔ یہ قدیم میوزیم ہے۔ انہوں نے کہا کہ یہاں بہت سے اہم آثار قدیمہ اور تاریخی نمائشیں رکھی گئی ہیں اور عمارت کو بڑھایا جا رہا ہے تاکہ ان کی بہتر طریقے سے دیکھ بھال کی جا سکے۔
معائنہ کے دوران بہار میوزیم کے ڈائرکٹر جنرل انجنی کمار سنگھ، وزیر اعلیٰ کے پرنسپل سکریٹری مسٹر دیپک کمار، وزیر اعلیٰ کے پرنسپل سکریٹری ڈاکٹر ایس سدھارتھ، وزیر اعلیٰ کے سکریٹری مسٹر انوپم کمار، شہری ترقیات اور رہائش محکمہ کے سکریٹری مسٹر ابھے کمار سنگھ، چیف منسٹر کے او ایس ڈی مسٹر گوپال سنگھ، میوزیم ڈائریکٹو ریٹ اور آثار قدیمہ ڈائریکٹو ریٹ کی ڈائریکٹر مسز رچنا پاٹل ، پٹنہ کے ڈی ایم مسٹر چندر شیکھر سنگھ ، ایس ایس پی مسٹر اوکاش کمار سمیت دیگر سینئر افسران موجود تھے ۔
