دربھنگہ 27 مئی (یواین آئی) بہار کے دربھنگہ ضلع کی ایک عدالت نے آج علی نگر اسمبلی حلقہ سے بھارتیہ جنتا پارٹی (بی جے پی) کے ایم ایل اے مشری لال یادو کو مارپیٹ کے ایک معاملے میں دو سال قید کے ساتھ ایک لاکھ روپے جرمانے کی سزا سنائی ہے۔ اراکین پارلیمنٹ اور اراکین اسمبلی ( ایم پی ایم ایل اے ) کے لئے تشکیل خصوصی اپیل کورٹ کے جج کم ضلع اور ایڈیشنل سیشن جج سمن کمار دیواکر کی عدالت نے منگل کو ایم ایل اے مشری لال یادو اور ان کے ایک ساتھی سریش یادو کے خلاف درج ایف آئی آ ر کے مخبرامیش مشرا کے ذریعہ دائر اپیل نمبر 6/2025 میں سزا کی مدت پر دونوں فریق کے دلائل سننے کے بعد ایم ایل اے اور سریش یادو کو دو۔ دو سال قید اور ایک۔ ایک لاکھ روپے مالی جرمانے کی سزا سنائی ہے ۔ مالی جرمانہ ادا نہ کرنے کی صورت میں ایک ماہ کی اضافی قید کی سزا بھگتنی ہوگی ۔ دربھنگہ کی ایم پیایم ایل اے کورٹ کی ایڈیشنل پبلک پراسیکیوٹر رینو جھا نے کہا کہ علی نگر کے بی جے پی ایم ایل اے مشری لال یادو اور سریش یادو کو نچلی عدالت نے 21 فروری 2025 کو تعزیرات ہند کی دفعہ 323 کے تحت تین ماہ قید اور 500 روپے جرمانے کی سزا سنائی تھی۔ مسٹر یادو نے نچلی عدالت کی طرف سے دی گئی سزا کے خلاف خصوصی عدالت میں اپیل کی تھی۔مسز جھا نے کہا کہ مسٹر دیواکر کی عدالت نے دائر اپیل کو 23 مئی کو مسترد کر دی تھی اور انہیں اور ان کے ساتھی کو نچلی عدالت کی طرف سے سنائی گئی سزا کی تکمیل کے لیے جیل بھیج دیا گیا تھا۔ اس کے ساتھ ہی معاملے کے مخبر امیش مشرا کی جانب سے سزا میں اضافے کے لیے دائر اپیل نمبر 6/2025 کی سماعت کے دوران تعزیرات ہند کی دفعہ 506 کے تحت مجرم قرار دیا گیا اور سزا کی مدت کے تعین کے لیے آج کی تاریخ مقرر کی گئی تھی۔
