ارریہ ( مشتاق احمد صدیقی ) سدبھاؤنا منچ ارریہ کی جانب سے ارریہ کے ایک ہوٹل میں افطار پارٹی کا اہتمام کیا گیا۔ جس میں ضلع بھر کے صائمین کے ساتھ برادران وطن اور خاص طور پر ایس ڈی او انیکیت کمار، ایس ڈی پی او رام پکار سنگھ اور سدبھاونا منچ سے وابستہ تمام افراد نے شرکت کیں اور ایک ساتھ افطار کرکے قومی یک جہتی اور امن وآشتی کا شاندار پیغام پیش کیا۔ جب سارے لوگ ایک پھلواری کے مانند مختلف پھولوں کی طرح الگ الگ خوشبوئیں بکھیر رہے تھے تھے تو اندازہ ہوا کہ اسے گنگا جمنی تہذیب کہتے ہیں کیونکہ اس کی ظاہری طور پر جھلک دکھائی دے رہی تھی اور آپسی محبت وانسیت اور بھائی چارہ صاف طور نظر آرہاتھا۔ تمام مسجدوں سے اذان سنتے ہی کھجور کھا کر تمام مہمانوں نےافطار کیا۔ سدبھاؤنا منچ کے سکریٹری محمد محسن نے کہا کہ رمضان کے مہینے میں ہر مسلمان کو روزہ رکھنا چاہئے اور اللہ کی عبادت کرنی چاہئے اور روزہ داروں کو افطار فراہم کرنے سے روزہ دار کے ساتھ ساتھ روزہ افطار کرانے والوں کو برابر اجر ملتا ہے۔ رمضان المبارک بہت مقدس مہینہ ہے، اس مہینے میں اللہ تعالیٰ خاص طور پر روزہ داروں پر اپنی رحمتیں نازل فرماتا ہے۔ یوا سدبھاؤنا منچ کے عفان کامل، پروفیسر زاہد انور، توصیف انور، رضی انور، سمت سمن، عامر رضا، طارق انور، سرفراز عالم، آفتاب عالم، راغب علی، عابد انصاری، عامر فاروق نے انتظامیہ کی ذمہداری کو بحسن وخوبی انجام دیا۔
