جالے، محمد رفیع ساگر: بہار اسمبلی کے بجٹ اجلاس 2025 میں باجپٹی کے ایم ایل اے مکیش کمار یادو نے عوامی مسائل کو مؤثر انداز میں اٹھایا، جس پر آر جے ڈی کے ریاستی کونسل کے رکن آفتاب عالم منٹو نے ان کی تعریف کرتے ہوئے حکومت سے فوری کارروائی کا مطالبہ کیا ہے۔آفتاب عالم منٹو نے کہا کہ مکیش کمار یادو نے جو مسائل اسمبلی میں پیش کیے، وہ نہ صرف ان کے حلقے بلکہ پورے بہار کے عوام کے لیے اہم ہیں۔ انہوں نے باورچیوں کے مشاہرے میں اضافہ، ریگا چینی مل کے کسانوں کی بقایاجات کی ادائیگی، عوامی تقسیم کاری نظام کے وینڈرز کے لیے ماہانہ 20,000 مشاہرہ مقرر کرنے اور گنگا ندی کی آلودگی جیسے حساس موضوعات پر حکومت کی توجہ مبذول کرائی۔انہوں نے کہا کہ حکومت کو اسکولوں میں کام کرنے والے باورچیوں کی تنخواہ میں اضافہ کرنا چاہیے، کیونکہ قلیل مشاہرہ ان کے ساتھ ناانصافی ہے۔ اسی طرح، ریگا چینی مل کے کسانوں کو چھ سال سے ان کی رقم نہیں ملی، جس کی وجہ سے وہ شدید مالی مشکلات کا شکار ہیں۔ حکومت کو فوری طور پر کسانوں کو بقایا رقم ادا کرنی چاہیے۔آفتاب عالم منٹو نے کہا کہ عوامی تقسیم کاری نظام کے وینڈرز کو ماہانہ 20,000 مشاہرہ دیا جانا چاہیے تاکہ وہ بہتر طریقے سے اپنی خدمات انجام دے سکیں۔ انہوں نے گنگا ندی کی بڑھتی آلودگی پر تشویش کا اظہار کرتے ہوئے کہا کہ حکومت کو اس مسئلے پر فوری اقدامات کرنے کی ضرورت ہے، کیونکہ یہ بہار کے لاکھوں لوگوں کی زندگی سے جڑا ہوا مسئلہ ہے۔انہوں نے کہا کہ مکیش کمار یادو نے اسمبلی میں جن مسائل پر آواز بلند کی ہے، وہ راشٹریہ جنتا دل کی عوام دوست پالیسیوں کا حصہ ہیں۔ آر جے ڈی ہمیشہ کسانوں، مزدوروں، غریبوں اور پسماندہ طبقات کے حقوق کے لیے لڑتا آیا ہے، اور مکیش کمار یادو نے اسی نظریے کو آگے بڑھاتے ہوئے حکومت سے جواب طلب کیا ہے۔آفتاب عالم منٹو نے کہا کہ مکیش کمار یادو کی قیادت اور عوامی مسائل پر ان کی مضبوط گرفت انہیں ایک جرات مند عوامی نمائندہ بناتی ہے۔ انہوں نے حکومت سے مطالبہ کیا کہ وہ ان مسائل پر فوری کارروائی کرے تاکہ بہار کے عوام کو انصاف مل سکے۔
