مبّی تھانے کے انچارج دیپک کمار معطل، ایس ایس پی کا سخت ایکشن

جالے: دربھنگہ کے سینئر سپرنٹنڈنٹ آف پولیس (ایس ایس پی) جگو ناتھ ریڈی جلا ریڈی نے اپنے فرائض کی انجام دہی میں لاپروائی برتنے کے الزام میں مبّی تھانے کے انچارج، سب انسپکٹر دیپک کمار کو فوری اثر سے معطل کر دیا ہے۔ ان کا تبادلہ پولیس مرکز دربھنگہ کر دیا گیا ہے۔یہ کارروائی اس وقت کی گئی جب یہ انکشاف ہوا کہ بھولا رام، جو 8 فروری 2025 کو قیدرآباد میں کام کے لیے گیا تھا اور لاپتہ ہو گیا تھا، کے معاملے میں مبّی تھانہ پولیس کی جانب سے کسی بھی قسم کی تفتیش نہیں کی گئی۔ اہل خانہ نے 10 فروری کو اس کی گمشدگی کی رپورٹ درج کرائی تھی۔ بعد ازاں 26 فروری کو بیںتا تھانے کی پولیس نے ریلوے ٹریک پر ایک زخمی شخص کو پایا، جسے علاج کے لیے ڈی ایم سی ایچ لے جایا گیا، جہاں اہل خانہ نے اس کی شناخت بھولا رام کے طور پر کی۔ علاج کے دوران بھولا رام کی موت ہو گئی۔اس واقعے میں مبّی تھانیدار کی مبینہ لاپروائی پر سخت کارروائی کرتے ہوئے ایس ایس پی نے انہیں معطل کر دیا ہے۔