پٹنہ 30 مئی :بہار جنتا دل (یو) کے معزز ریاستی صدر امیش سنگھ کشواہا نے جمعہ کو جاری اپنے بیان میں کہا کہ وزیر اعظم نریندر مودی اور وزیر اعلیٰ نتیش کمار کی مشترکہ قیادت نہ صرف این ڈی اے کی مضبوطی کی علامت ہے، بلکہ بہار کی طویل مدتی، جامع اور پائیدار ترقی کی مضبوط بنیاد بھی ہے۔
مسٹر کشواہا نے کہا کہ پٹنہ ہوائی اڈے کے جدید ترین ٹرمینل کا افتتاح، بیہٹا ہوائی اڈے کے نئے سول انکلیو کا سنگ بنیاد اور وزیر اعظم نریندر مودی کے ہاتھوں 48,520 کروڑ روپے کے کثیر شعبہ جاتی ترقیاتی پروجیکٹوں کا سنگ بنیاد اور افتتاح بہار کے لیے تاریخی ثابت ہوگا۔ ان پروجیکٹوں میں نئی نگر سپر تھرمل پاور پروجیکٹ، بڑی قومی شاہراہوں کو چوڑا کرنا، بکسر-بھرولی گنگا پل اور سون نگر-محمد گنج تیسری ریلوے لائن جیسی اہم اسکیمیں شامل ہیں۔
انہوں نے کہا کہ یہ ترقیاتی کام نہ صرف بہار کے بنیادی ڈھانچے کو مضبوط کریں گے بلکہ صنعتی ترقی اور بہتر رابطے کے ذریعے عام لوگوں کے معیار زندگی کو بھی بہتر بنائیں گے۔ ریاستی صدر نے یہ بھی کہا کہ موجودہ سیاسی منظر نامے میں وزیر اعظم مودی اور وزیر اعلیٰ نتیش کمار کی موثر، دور اندیش اور ایماندار قیادت بہار کو تیزی سے خوشحال بھارت اور خوشحال بہار کی طرف لے جا رہی ہے۔ امیش سنگھ کشواہا نے کہا کہ مودی-نتیش کی ترقی پر مبنی جوڑی عوام کی ہر خواہش کو حقیقت میں بدل رہی ہے۔ جب بھی یہ جوڑی اسٹیج پر ہوتی ہے، این ڈی اے کارکنوں کا جوش دوبالا ہوجاتا ہے اور ترقی کی گاڑی تیز رفتاری سے آگے بڑھتی ہے۔
