بہارشریف(محمد راشد عالم) نالندہ میں ایک دل دہلا دینے والا واقعہ سامنے آیا ہے جہاں پرول پور تھانہ علاقہ کے پیلیچ گاؤں میں 14 سالہ لڑکی کی کھیت سے لاش ملنے سے علاقہ میں سنسنی پھیل گئی۔متوفی کی شناخت 14 سالہ کویتا کماری کے طور پر ہوئی ہے جو پیلیچ گاؤں کے رہائشی رام برکش مانجھی کی بیٹی ہے۔اس واقعہ کے بعد پورے گاؤں میں سوگ کا ماحول ہے۔متوفی کے والد رام برچھ مانجھی نے بتایا کہ ان کی بیٹی کویتا کا اسی گاؤں کے جاٹو گوپ کے بیٹے سنی کمار کے ساتھ معاشقہ چل رہا تھا۔ اتوار کی رات تقریباً 11 بجے سنی کمار نے کویتا کو بلایا اور اسے کھیت میں لے گیا اور اس کا گلا دبا کر بے دردی سے قتل کر دیا۔گھر والوں نے بتایا کہ جب کویتا پیر کی صبح تقریباً 4 بجے گھر میں نظر نہیں آئی تو ان کی تلاش شروع کی گئی۔ کافی تلاش کے بعد کویتا کی لاش گاؤں کے ایک کھیت میں پڑی ہوئی ملی۔اہل خانہ نے فوری طور پر پرول پور تھانہ کو اس کی اطلاع دی۔لڑکی کا چھ ماہ قبل اسی گاؤں کے ایک نوجوان کے ساتھ معاشقہ چل رہا تھا جس پر دونوں خاندانوں میں پنچایت کے ذریعے معاملہ طے پا گیا تھا۔اس کے باوجود ان کی محبت کا سلسلہ جاری رہا اور وہ فون پر چپکے سے بات بھی کرتے رہے۔ذرائع کی مانیں تو اس کیس کا تعلق غیرت کے نام پر قتل سے بتایا جا رہا ہے، تاہم پولیس فی الحال یہ کہہ رہی ہے کہ تمام کیسز کی مکمل چھان بین کی جا رہی ہے۔اطلاع ملتے ہی پولیس کی ٹیم موقع پر پہنچ گئی اور جائے وقوعہ کا معائنہ کیا۔لاش کو تحویل میں لے کر پوسٹ مارٹم کے لیے صدر ہسپتال بھیج دیا گیا۔واقعہ کے بارے میں ہلسا کے ڈی ایس پی 2 گوپال کرشنا نے کہا کہ معاملے کی سنجیدگی سے تحقیقات کی جا رہی ہے اور جلد ہی مجرموں کو گرفتار کر لیا جائے گا۔اس واقعہ سے پیلیچ گاؤں میں غم وغصہ کی لہر دوڑ گئی ہے۔لواحقین اور گاؤں والوں نے ملزمان کے خلاف سخت کارروائی کا مطالبہ کیا ہے اور ایف ایس ایل اور ڈاگ سکواڈ کی ٹیم نے موقع پر پہنچ کر تفتیش شروع کر دی ہے۔
