پٹنہ، 25 مارچ :وزیر اعلیٰ نتیش کمار نے انٹرمیڈیٹ کا امتحان پاس کرنے والے تمام طلباء کو دل کی گہرائیوں سے مبارکباد اور نیک خواہشات کا اظہار کیا ہے۔ وزیر اعلیٰ نے کہا ہے کہ اس بار طالبات نے آرٹس، سائنس اور کامرس کی تینوں فیکلٹیز میں ٹاپ کیا ہے۔ وزیراعلیٰ نے طلباء کی کارکردگی پر مسرت کا اظہار کرتے ہوئے کہا کہ اس پر نہ صرف طلباء بلکہ ان کے والدین بھی مبارکباد کے مستحق ہیں۔ طالبات کی یہ کامیابی خواتین کو بااختیار بنانے کی ایک بڑی مثال ہے۔ ریاستی حکومت کی طرف سے لڑکیوں کے لیے چلائی جانے والی مختلف اسکیموں سے ان کے اعتماد میں اضافہ ہوا ہے اور وہ ہر میدان میں مسلسل ترقی کر رہی ہیں۔ وزیراعلیٰ نے تمام کامیاب طلباء کے روشن مستقبل کی خواہش بھی کی۔ وزیر اعلیٰ نے بہار اسکول ایگزامینیشن بورڈ اور محکمہ تعلیم کو بھی بہت کم وقت میں امتحانی نتائج شائع کرنے پر مبارکباد دی۔ انہوں نے کہا کہ نتائج کی بروقت اشاعت سے طلباء کو مزید تعلیم حاصل کرنے اور اعلیٰ کلاسوں میں داخلہ لینے کے لیے کافی وقت ملے گا۔ اس سے ان کے حوصلے بلند ہوں گے۔قابل ذکر ہے کہ اس بار انٹرمیڈیٹ کے امتحان میں 12 لاکھ 80 ہزار 211 امیدواروں نے شرکت کی تھی جن میں سے 11 لاکھ 7 ہزار 330 امیدوار کامیاب ہوئے جو کل امیدواروں کا 86.50 فیصد بنتا ہے۔ اس میں 5 لاکھ 59 ہزار 65 لڑکیاں اور 5 لاکھ 48 ہزار 148 لڑکوں نے کامیابی حاصل کی ہے۔
