پٹنہ، 31 مئی، وزیر اعلیٰ نتیش کمار نے آج نالندہ میڈیکل کالج و اسپتال کے احاطہ میں 264 کروڑ روپے کی لاگت سے 200 بستروں والے گورنمنٹ طبی کالج و اسپتال کا ریموٹ کے ذریعے نام کی تختی کی نقاب کشائی کرکے کام کا آغاز کیا۔ گورنمنٹ طبی کالج و اسپتال 10 ایکڑ پر تعمیر کیا جا رہا ہے۔افسران نے ماسٹر پلان کے ذریعے وزیر اعلیٰ کو تعمیر کئے جانے والے مختلف حصوں، بوائز ہاسٹل، گرلز ہاسٹل، پی جی انٹرن ہاسٹل، پرنسپل، میڈیکل سپرنٹنڈنٹ وغیرہ کے بارے میں تفصیلی جانکاری دی۔
وزیراعلیٰ نے کام کے آغاز کے بعد احاطہ کا معائنہ کیا۔ اس دوران انہوں نے کہا کہ گورنمنٹ طبی کالج و ہسپتال کا تعمیراتی کام تیزی اوربہتر طریقے سے کرائیں۔ ریاست کے ہر شہری کو قابل رسائی، سستی اور معیاری طبی خدمات فراہم کرنا ہماری ترجیح ہے۔ بہار کی سرزمین کا یونانی سے ہمیشہ گہرا تعلق رہا ہے، اس لیے ریاستی حکومت یونانی نظام طب کو مضبوط بنانے کی سمت میں کام کر رہی ہے۔ ریاست کے عام لوگوں کو آیورویدک، ہومیوپیتھی، یونانی جیسی بہترین طبی سہولیات فراہم کرنے کے لیے بھی کام کیا جا رہا ہے۔قابل ذکر ہے کہ 22 نومبر 2021 کو وزیر اعلیٰ نتیش کمار نے گورنمنٹ طبی کالج و اسپتال کا دورہ کیا تھا۔ اس وقت اس کی عمارت کی حالت اچھی نہیں تھی۔ اس لیے وزیر اعلیٰ نے پٹنہ میں کسی اور مقام پر زمین کی نشاندہی کرنے اور اس کی توسیع کرنے اور نئی اور اچھی عمارت تعمیر کرنے کی ہدایت دی تھی۔ اس کے لیے نالندہ میڈیکل کالج و اسپتال احاطہ کے بغل میں 10 ایکڑ اراضی کی نشاندہی کی گئی ہے۔ تعمیراتی کام مکمل ہونے کے بعد گورنمنٹ طبی کالج واسپتال کو اس کے پرانے کیمپس سے نئی عمارت میں منتقل کر دیا جائے گا۔
اس پروجیکٹ کے تحت 200 بستروں پر مشتمل ہسپتال، 500 کی گنجائش والا آڈیٹوریم، 400 کی گنجائش والا بوائز ہاسٹل اور 350 کی گنجائش والا گرلز ہاسٹل، میڈیسن مینوفیکچرنگ ہاؤس اور کالج کے پروفیسرز اور دیگر عملے کے لیے رہائش کا انتظام کیا گیا ہے۔ اس میڈیکل کالج میں طلباء کا داخلہ سالانہ 150 رکھاگیا ہے۔ تمام زیر تعمیر عمارتیں زلزلہ مزاحم، سولر لائٹس اور بارش کے پانی کو ذخیرہ کرنے کے نظام سے لیس کیا گیا ہے۔ کالج اور ہسپتال کی عمارت ایئر کنڈیشنڈ ہو گی۔ یہ اسکیم 30 ماہ میں مکمل ہونے کا امکان ہے۔قدیم نظام طب میں عالمی سطح پر یونانی کا نمایاں حصہ ہے۔ یونانی دوا صرف بیماری کا علاج نہیں کرتی بلکہ یہ نظام طب انسان کی پوری قدرتی جسم، دماغ اور روح کے توازن پر مبنی ہے۔ طب یونانی نظام نہ صرف علاج فراہم کرتا ہے بلکہ طرز زندگی، خوراک، نیچروپیتھی اور حکیمی ادویات کے ذریعے انسان کو صحت مند رکھنے پر بھی زور دیتا ہے۔
پروگرام میں نائب وزیر اعلیٰ سمراٹ چودھری، نائب وزیر اعلیٰ وجے کمار سنہا، بہار قانون ساز اسمبلی کے اسپیکر نند کشور یادو، آبی وسائل اور پارلیمانی امور کے وزیر وجے کمار چودھری، وزیر صحت منگل پانڈے، پٹنہ کی میئر مسز سیتا ساہو، وزیر اعلیٰ کے پرنسپل سیکریٹری مسٹر دیپک کمار ، ڈیولپمنٹ کمشنر و صحت محکمہ کے ایڈیشنل چیف سیکریٹری مسٹر پرتے امرت ، وزیر اعلیٰ کے سیکریٹری مسٹر انوپم کمار، وزیر اعلیٰ کے او ایس ڈی مسٹر گوپال سنگھ، ڈی ایم ڈاکٹر چندر شیکھر سنگھ، ایس ایس پی مسٹر اوکاش کمار سمیت محکمہ صحت کے دیگر سینئر افسران موجود تھے۔
