اسلام آباد (یو این آئی) پاکستانی سیکیورٹی فورسز کے صوبہ خیبرپختونخوا کے علاقے درشہ خیل میں خفیہ معلومات کی بنیاد پر آپریشن کے دوران کالعدم تحریک طالبان پاکستان کے 17 عسکریت پسند ہلاک اور متعدد زخمی ہوگئے۔اطلاعات کے مطابق کرک کے تھانہ شاہ سلیم کے علاقے درشہ خیل میں سیکیورٹی فورسز اور پولیس نے انٹیلی جنس بیسڈ آپریشن کیا، یہ علاقہ لکی مروت اور کرک کی باؤنڈری پر واقع ہے۔سیکیورٹی ذرائع کے مطابق خفیہ معلومات پر 22 مسلح افراد پر مشتمل گروہ کو درشہ خیل میں باقاعدہ منصوبہ بندی کے تحت گھیرے میں لیا گیا اور انتہائی مہارت سے گھیرا تنگ کرتے ہوئے انہیں نشانہ بنایا گیا جس کے باعث 17 افراد ہلاک ہوئے اور سات سے دس خوارج کے شدید زخمی ہونے کی اطلاعات ہیں۔سیکیورٹی ذرائع کے مطابق کرک میں یہ آپریشن ملا نذیر گروپ کے ارکان کی موجودگی کی مصدقہ اطلاع پر کیا گیا۔اس موقع پر وزیراعظم محمد شہباز شریف نے ضلع کرک میں 17 خوارج کو ہلاک کرنے پر سکیورٹی فورسز کو خراج تحسین پیش کرتے ہوئے کہا ہے سکیورٹی فورسز کی پیشہ ورانہ مہارت اور بروقت کارروائی کی بدولت خوارج کے مذموم عزائم خاک میں مل گئے۔
