ابوظہبی، (یوق این آئی) متحدہ عرب امارات اور اردن کے درمیان ریلوے نیٹ ورک کی تعمیر کے لیے اہم معاہدہ طے پا گیا ہے، جس کے تحت دونوں ممالک ایک مشترکہ ریلوے کمپنی بھی قائم کریں گے۔معاہدے پر دستخط کی تقریب میں شیخ منصور بن زاید النہیان اور اردن کے وزیر اعظم ڈاکٹر جعفر حسن نے شرکت کی، جب کہ باضابطہ دستخط یو اے ای کے سہیل بن محمد المزروعی اور اردن کے ڈاکٹر نضال القطامین نے کیے۔ معاہدے کے تحت 360 کلومیٹر طویل ریلوے لائن تعمیر کی جائے گی، جو اردن کے معدنی وسائل سے بھرپور علاقوں الشیدیہ اور غور الصافی کو بندرگاہ عقبہ سے منسلک کرے گی۔ اس منصوبے کے ذریعے سالانہ 16 ملین ٹن فاسفیٹ اور پوٹاش کی ترسیل ممکن بنائی جائے گی۔ اس بڑے انفرااسٹرکچر منصوبے پر مجموعی طور پر 2.3 ارب امریکی ڈالر کی سرمایہ کاری کی جائے گی۔نئی قائم ہونے والی یو اے ای-اردن ریلوے کمپنی، ابوظبی کی ایل اماد ہولڈنگ اور اردنی شراکت داروں کا مشترکہ منصوبہ ہوگی، جب کہ منصوبے کے نفاذ، آپریشن اور دیکھ بھال کی ذمہ داری اتحاد ریل کو سونپی جائے گی۔ اس موقع پر شیخ منصور بن زاید النہیان نے کہا کہ یہ معاہدہ دونوں ممالک کے مضبوط برادرانہ تعلقات اور مشترکہ ترقیاتی وژن کی عکاسی کرتا ہے۔ان کے مطابق یہ ریلوے منصوبہ اردن کی برآمدات، لاجسٹکس نظام اور مجموعی معاشی ترقی کو فروغ دے گا۔ انھوں نے مزید کہا کہ اس منصوبے سے ٹرانسپورٹ لاگت میں کمی آئے گی اور ہزاروں نئے روزگار کے مواقع پیدا ہوں گے۔ یہ معاہدہ 2023 میں طے پانے والے 5.5 ارب ڈالر کے وسیع سرمایہ کاری معاہدے کا تسلسل ہے، جب کہ متحدہ عرب امارات نے خطے میں اسٹریٹجک ترقیاتی منصوبوں اور معاشی شراکت داری کو مزید مضبوط بنانے کے عزم کا اعادہ کیا ہے۔
