بوکارو، (یو این آئی) سابق مرکزی وزیر اور کانگریس کے سینئر لیڈر جے رام رمیش نے کہا کہ مرکز کی نریندر مودی حکومت محض ایک یادو صنعت کاروں کو فائدہ پہنچانے کے لیے ملک کے تمام صنعت کاروں، مزدوروں اور کسانوں کے ساتھ بہت بڑی ناانصافی کر رہی ہے ۔ جئے رام رمیش جو ‘بھارت جوڑو نیا ئے یاترا’ میں راہل گاندھی کے ساتھ جھارکھنڈ کے بوکارو پہنچے تھے ، نے آج یہاں ایک پریس کانفرنس میں کہا کہ بی جے پی حکومت ملک کی صنعت کو فروخت کرنے کاکام کر رہی ہے ۔ ملک کے اندر بے روزگاری میں اضافہ ہوا ہے ۔ نوجوان خودکشی کر رہے ہیں۔خواتین کے انصاف، نوجوانوں کے انصاف، مزدوروں کے انصاف، کسانوں کے انصاف اور برابری کے انصاف کیلئے راہل گاندھی بھارت جوڑو نیا یاترا پر چل پڑے ہیں۔ اس یاترا کے تحت ہم آئین اور عوامی اداروں کا ہر قیمت پر تحفظ کریں گے ۔ کانگریس لیڈر نے کہا کہ ملک میں کنٹراکٹ لیبر سسٹم بند ہونا چاہئے ۔ مزدوروں کے حقوق کو پامال کیا جا رہا ہے ۔ کانگریس مزدوروں کو حقوق دلانے کے لیے پابند عہد ہے ۔ بی جے پی سرکاری اداروں کو فروخت کر تی ہے ۔ کانگریس اسے بچاتی ہے اور لوگوں کو روزگار فراہم کرتی ہے ۔ انہوں نے کہا کہ درج فہرست ذات اور درج فہرست قبائل کے لوگوں کے لیے اب روزگار حاصل کرنا مشکل ہو گیا ہے ۔ مسٹر رمیش نے کہا کہ اس مالی سال میں 60 لاکھ ٹن اسٹیل درآمد کیا گیا ہے ۔ جن میں سے ایک تہائی ا سٹیل چین سے درآمد کیا گیا ہے ۔ ایسے میں پبلک سیکٹر اور پرائیویٹ سیکٹر کی صنعتوں پر بحران کے بادل چھائے ہوئے ہیں۔ ملک کی 35 فیصد صنعتیں بند ہیں کیونکہ چین سے یہاں سستی اشیاءآرہی ہیں۔ مسٹر رمیش نے مزید کہا کہ بی جے پی نے مہاراشٹر اور بہار میں سازش کرکے حکومت بنائی۔ انہوں نے جھارکھنڈ میں بھی حکومت بنانے کی کوشش کی لیکن کامیابی نہیں ملی۔ جھارکھنڈ میں مخلوط حکومت کسی بھی قیمت پر اپنی مدت پوری کرے گی۔ انہوں نے کہا کہ اس یاترا کے ذریعے ہم لوگوں کو منظم اور بااختیار بنانے میں کامیاب ہوں گے تاکہ ہم مرکز سے بی جے پی حکومت کو اکھاڑ پھینکنے میں کامیاب ہو سکیں۔
