علی گڑھ،سماج نیوز سروس: عالمی تمباکو نوشی مخالف یوم پر علی گڑھ مسلم یونیورسٹی کے رجسٹرارمسٹر محمد عمران آئی پی ایس نے آج ایک بائیک ریلی کو جھنڈی دکھا کر روانہ کیا جس میں آج 100 سے زائد طلباء اور عملے کے اراکین شامل ہوئے۔ مسٹر عمران نے طلباء پر زور دیا کہ وہ کسی بھی شکل میں تمباکو کے استعمال سے دور رہیں اور تمباکو کا استعمال کرنے والے لوگوں کو اس کے مضر اثرات سے بچانے کے لیے انھیں ضروری معلومات فراہم کریں اور انھیں بتائیں کہ تمباکو میں کینسر کا سبب بننے والے اجزاء ہوتے ہیں۔ ریلی کا اہتمام ڈاکٹر زیڈ اے ڈینٹل کالج کے اورل اینڈ میکزیلو فیشل سرجری شعبہ نے ایسوسی ایشن آف اورل اینڈ میکزیلو فیشل سرجنز آف انڈیا کے اشتراک سے کیا تھا۔اپنے استقبالیہ کلمات میں صدر شعبہ ڈاکٹر غلام سرور ہاشمی نے کہا کہ یہ عالمی دن دنیا بھر میں تمباکو مصنوعات اور عام لوگوں میں اس کے استعمال کو روکنے کے لیے عالمی ادارہ صحت کی قرارداد کو فروغ دینے کے لیے منایا جاتا ہے۔انہوں نے کہا کہ بالغوں میں تمباکو کا استعمال برسوں سے ایک تشویشناک بات رہی ہے لیکن پچھلی دہائی کے دوران نوعمرلوگوں میں بھی اس کا استعمال شروع ہوگیا ، چنانچہ نوجوانوں کو اس سے دور رہنے کے لیے ایک بھرپور مہم چلانے کی ضرورت ہے۔انہوں نے کہا کہ سادہ پان مسالہ اتنا ہی خطرناک ہے جتنا تمباکو سے بھراپان مسالہ کیونکہ دونوں قسم کے پان مسالے ہر عمر کے لوگوں میں کینسر کا سبب بنتے ہیں۔قائم مقام ڈین، فیکلٹی آف میڈیسن، پروفیسر سیما حکیم، پرنسپل نرسنگ کالج پروفیسر فرح اعظمی، پرنسپل، ڈاکٹر زیڈ اے ڈینٹل کالج پروفیسر آر کے تیواری اور دیگر اساتذہ نے اس مہم میں حصہ لیا۔
