دیوبند (سماج نیوز سروس) شہر مظفرنگر کے معروف اسلامی علمی ادارہ شاہ اسلامک لائبریری کے زیر اہتمام آج ایک خصوصی پروگرام کاانعقاد کیاگیا،جس میں مجاہدآزادی عظیم قائد حضرت شیخ الہند مولانامحمود حسن دیوبندیؒ کی یاد میںمظفرنگر میں قائم ہونے والے یادگاری ادارہ کے متعلق تفصیلات بتائی گئی۔اس موقع پر پروگرام کے ناظم اور ادارہ کے بانی قاری محمد خالد بشیر قاسمی نے بتایا کہ جن ہمارے اکابرین اور ملی وسماجی رہنماؤں نے ملک کیلئے اور قوم کی فلاح و بہبود کیلئے جدوجہد کی ہے ،انکی حیات و خدمات اور تاریخ سے نوجوان نسل کو واقف کرانا ضروری ہے تاکہ انکے اندر بھی ملک و قوم کی خدمت کرنے کا جذبہ پیدا ہوسکے۔انہوںنے کہاکہ تعلیم و تربیت کے فقدان کے سبب معاشرہ غلط کاموں اور گناہوں کی جانب جارہاہے،اسلئے معاشرہ میں تعلیم کے فروغ کے ساتھ برائی سے بچنا اور دوسروں کو بچانے کی فکر کرنا بھی ضروری ہے۔انہوں نے بتایاکہ مظفرنگر شہر میں حضرت شیخ الہندؒ کی یاد میں قائم ہونے والا یہ پہلا ادارہ ہے۔جس کی جلدہی شروعات جائے گی،جو یقینی طورپر نئی نسل کی تعلیم و تربیت میں بنیادی رول ادا کریگا۔اس دوران قاری خالد بشیرقاسمی نے حاضرین کو ادارہ کے متعلق جملہ تفصیلات بتاتے ہوئے خاکہ پیش کیا،جس کی سبھی نے پذیرائی کرتے ہوئے حوصلہ افزائی کی۔ اس موقع پر محبوب عالم ایڈوکیٹ، مولانا قاری دانش نبیل قاسمی ، نوشاد قریشی، قاری شوکت علی، ماسٹر شہزاد علی نے بھی اپنے خیالات کا اظہارکرتے ہوئے ملک کی آزادی اورحضرت شیخ الہندؒکی خدمات پر روشنی ڈالی اور ادارہ کی اس کاوش کی ستائش کی۔ پروگرام کی صدارت مفتی عبد الستار قاسمی نے کی۔شرکاء میں ماسٹرمہربان علی ،حافظ مطلوب، محمد سلمان، عبد اللہ قریشی اورمحمد اخلد وغیرہ کے نام قابل ذکر ہیں۔
