فٹنس، اتحاد اور کمیونٹی کی شرکت کو فروغ دینے کے لیے میراتھن میں دو ہزار رنرز دوڑے

گریٹر نوئیڈا (یو این آئی) فٹنس، اتحاد اور کمیونٹی کے جذبے کے ساتھ مختلف زمروں کے دو ہزار سے زیادہ رنرز نے ‘شیو ناڈر یونیورسٹی 10کے چیلنج میراتھن کے دوسرے ایڈیشن میں حصہ لیا۔
شیو ناڈر انسٹی ٹیوشن آف ایمینینس یونیورسٹی کے کیمپس میں برکس گیمز کی گولڈ میڈلسٹ خاتون باکسر انامیکا ہڈا اورشیو ناڈر انسٹی ٹیوشن آف ایمینینس کے وائس چانسلر اور ایچ سی ایل ہیلتھ کیئر کے سی ای او اور نائب صدر شکھر ملہوترا نے میراتھن کو جھنڈی دکھا کر روانہ کیا۔ میراتھن کا انعقاد تین زمروں 10 کلومیٹر دوڑ، 5 کلومیٹر دوڑ اور 5 کلومیٹر واک زمروں میں کیا گیا۔ اس میں مختلف عمر کے لوگوں کے گروپ نے شرکت کی۔
مردوں کے 10کے چیلنج میں اشون 32 منٹ 42 سیکنڈ میں دوڑ مکمل کرکے فاتح بنے۔ خواتین کے 10کے چیلنج میں نیتا رانی نے شاندار کارکردگی کا مظاہرہ کرتے ہوئے 36 منٹ 24 سیکنڈ میں ریس مکمل کر کے ٹاپ پوزیشن حاصل کی۔ مردوں کی پانچ کلومیٹر کی دوڑ میں سمت کمار 16 منٹ اور چار سیکنڈ کے وقت کے ساتھ پہلے نمبر پر رہے۔ خواتین کے 5کے چیلنج میں 18 منٹ 46 سیکنڈ میں ریس مکمل کرنے والی مدینہ پال فاتح رہیں۔
ڈاکٹر امریش ٹونی، ڈائریکٹر، شعبہ کھیل، شیو نادر یونیورسٹی نے کہا، "شیو نادر یونیورسٹی 10کے چیلنج کے دوسرے ایڈیشن کے لیے زبردست ردعمل دیکھ کر بہت اچھا لگا۔ یہ دیکھنا انتہائی متاثر کن ہے کہ تمام شعبوں کے لوگ اپنے اور اپنے آس پاس کے لئے ایک صحت مند مستقبل میں تعاون کرنے کے لیے اس طرح کے جذبے اور لگن کے ساتھ اکٹھے ہوتے ہیں۔ "شیو نادر یونیورسٹی 10کے چیلنج صحت، فلاح وبہبود اور کمیونٹی شرکت کو فروغ دینے کے لئے شیو نادر یونیورسٹی کے عزم کا ثبوت ہے۔”