سید پرویز قیصر
ہندوستانی ہاکی ٹیم کے دفاعی کھلاڑی ہرمنپریت بین الاقوامی میچوں میں اپنے گولوں کی ڈبل سنچری مکمل کرنے میں کامیاب ہوگئے ہیں۔جنوبی افریقہ کے خلاف چین کے شہر ہولون بوئر میں جاری ایشیائی چمپیئز ٹرافی کے میچ میں انہوں نے دو گول کرنے کے بعد ایسا کیا۔ ہندوستان نے اس لیگ میچ میں 1 3– سے کامیابی حاصل کی۔ ہرمنپریت سنگھ نے پنالٹی کارنر پر43 ویں منٹ میں ہندوستان کو تیسرا گول کیا جو228 بین الاقوامی میچوں میں انکا دو سواں گول تھا۔
ہرمنپریت سنگھ ہاکی کے بین الاقوامی میچوں میں دو سو یا اس سے زیادہ گول کرنے والے ہندوستان کے تیسرے اور کل ملاکر12 ویں کھلاڑی بنے۔ انہوں نے سب سے زیادہ گول آسڑیلیا کے خلاف کئے ہیں۔ آسڑیلیا کے خلاف جو 29 میچ کھیلے ہیں اس میں19 گول کئے ہیں۔ جاپان کے خلاف 21 میچوں میں انہوں نے17 گول کئے ہیں۔ پاکستان کے خلاف 13 میچوں میں وہ16 گول کرنے میں کامیاب رہے ہیں۔ اسپین کے خلاف 14 میچوں میں انہوں نے15 گول مارے ہیں۔ نیوزی لینڈ کے خلاف انہوں نے جو سولہ میچ کھیلے ہیں اس میں وہ14 گول کرنے میں کامیاب رہے ہیں۔
پنالٹی کارنرس پر ہرمنپریت سنگھ نے173 گول کئے ہیں جبکہ پنالٹی اسٹروکس پر وہ25 گول کرنے میں کامیاب رہے ہیں۔انہوں نے دو فیلڈ گول بھی کئے ہیں۔ بارہ مرتبہ انہوں نے ہیٹ ٹرک کی ہے اور ایک میچ میں انکے سب سے زیادہ گول چار ہیں۔2023 میں انہوں نے سب سے زیادہ گول کئے تھے۔ اس سال انہوں نے33 میچوں میں 42گول کئے تھے۔2022 میں وہ31 میچوں میں38 گول کرنے میں کامیاب رہے تھے۔
بین الاقوامی ہاکی میں سب سے زیادہ گول ہندوستان کے دھیان چند نے کئے ہیں۔ انہوں نے1926 اور1949 کے درمیان جو185 بین الاقوامی ہاکی میچ کھیلے اس میں570 گول کئے۔ انہوں اوسط ہر میچ3.08 گول کئے جو اوسط کے اعتبار سے دوسری سب سے اچھی کارکردگی ہے۔ پاکستان کے سہیل عباس نے1998 اور2012 کے درمیان جن311 بین الاقوامی میچوں میں شرکت کی ہے ان میں1.12 کی اوسط کے ساتھ348 گول کئے ہیں۔ ہالینڈ کے پال لیجنٹس بین الاقوامی ہاکی میں تیسرے سب سے زیادہ گول کرنے والے کھلاڑی ہیں۔ انہوں نے1982 اور2004 کے درمیان جن177 بین الاقوامی میچوں میں شرکت کی ہے ان میں1.51 کی اوسط کے ساتھ268 گول کئے ہیں۔ سب سے اچھی اوسط کے ساتھ بین الاقوامی ہاکی میں گول کرنے کا ریکارڈ ہندوستان کے بلبیر سنگھ سینئر کے پاس ہے جنہوں نے1947 اور1958 کے درمیان61 میچوں میں4.03 کی اوسط کے ساتھ246 گول کئے۔ وہ ہندوستان کی جانب سے بین الاقوامی ہاکی میںدوسرے سب سے زیادہ اور کل ملاکر تیسرے سب سے زیادہ گول کرنے والے کھلاڑی ہیں۔
کنور ڈیگ وجے سنگھ نے، جو کے ڈی سنگھ بابو کے نام سے زیادہ جانے جاتے ہیں، ہندوستان کی جانب سے چوتھے سب سے زیادہ گول کرنے والے کھلاڑی ہیں۔ انہوںنے 1946 اور1950 کے درمیان جن80 میچوں میں ہندوستان کی نمائندگی کی اس میں2.19 کی اوسط کے ساتھ175 گول کئے تھے۔ بین الاقوامی ہاکی میں سب سے زیادہ میچ کھیلنے والے دھن راج پلے ہندوستان کی جانب سے پانچویں زیادہ گول کرنے والے کھلاڑی ہیں۔ انہوں نے1989 اور2004 کے درمیان جو چار سو میچ کھیلے ہیں ان میں0.43 گول فی میچ کی اوسط سے170 گول کئے ہیں۔
