نئی دہلی،عامر سلیم خان ؒکی یاد میں دہلی اسٹیٹ عرس کمیٹی کی جانب سے ریاستی حج کمیٹی میں تعزیتی نشست کا اہتمام کیاگیا جس میں صحافیوںنے مطالبہ کیا کہ دہلی حج کمیٹی اور عرس کمیٹی عامر سلیم خان ؒ کے نام سے ایک ایوارڈ موسوم کرے جس سے ان کی یاد اور اردو صحافت میں دی گئی ان کی خدمات کو یاد رکھا جاسکے۔ دہلی اسٹیٹ عرس کمیٹی کے چیئرمین ایف آئی اسماعیلی کی جانب سے یقین دہانی کرائی گئی اورا نہوںنے وعدہ کیا کہ آئندہ 15جنوری سے شروع ہونے والے عرس میلے کی تقریب میں عامر سلیم خان ؒ ایوارڈ اردو صحافیوںکو دیا جائے گا۔ اتنا ہی نہیں انہوںنے کہا کہ اردوصحافیوں کو لے کر میں ہمیشہ سے سنجیدہ رہتا ہوں اور میں جانتا ہوں کہ ان کی اجرت بہت معمولی ہے جبکہ یہ لوگ بہت محنت کرتے ہیں اوران کےلئے میں سرکاری سطح سے لے کر ہر سمت میں کوشش کروں گا اردو میڈیا کےلئے کچھ کام کرسکوں یہ میرے لئے اعزاز کی با ت ہے میں عامر سلیم خان کی خبروں کومسلسل پڑھتا تھا جس میں سچائی اور حقیقت بیانی ہوتی تھی ۔دہلی حج کمیٹی کے ایگزیکٹوآفیسر جاوید عالم نے بھی کہا کہ اسطرح کے ایوارڈ کے بارے میں ہم اپنی میٹنگ میں ایک تجویز رکھیں گے اور کوشش کریں گے کہ جلد اس پر فیصلہ ہو اس کے علاوہ انہوںنے بتایا کہ کسی سڑک کا نام بھی عامر سلیم خان کے نام پر ہونا چاہئے اس کےلئے آپ لوگ چیف سکریٹری اور ایل جی سے لے کر ایل ایم کو رابطہ کریں یہ کوئی مشکل کام نہیں ہے۔ عام آدمی پارٹی کے ترجمان عمران حسن نے تعزیت کرتے ہوئے کہا کہ دہلی کے اداروں کی خبروں کومسلسل قاری تک پہنچانے کا جو طریقہ وہ اپناتے تھے وہ اپنے آپ میں نمایاں تھا اس موقع پر سائبان کے ایڈیٹر جاوید رحمانی ،سینئر صحافی محمد اویس، انجم جعفری ،ڈاکٹر امیر امروہوی ،امیر احمد راجا، غفران آفریدی، وصی عثمانی ،محمد راحم ،محمد گلزار، محمد رامش سابق کونسلر واجد خان کے علاوہ فرزان قریشی ،عطاءالرحمن اجملی، محمد احمد،وغیرہ نے بھی اپنے خیالات کا اظہار کیا۔ بات چیت کے دوران دہلی اردو اکیڈمی کے وائس چیئرمین حاجی تاج محمد نے اردو صحافیوںمیں عامر سلیم خان کا مرتبہ سب سے اوپر بتایا۔
