دیوبند،سماج نیوز سروس: سماج وادی پارٹی کے قومی سکریٹری بھون جوشی نے کہا ہے کہ اترپردیش کی بی جے پی حکومت برہمنوں کے خلاف ہے ۔انہوں نے کہا کہ برہمنوں کو جس طریقہ سے بے عزت کرنے کے ساتھ ساتھ ان کا استحصال کیا جارہا ہے اس کو مزید برداشت نہیں کیا جاسکتا ۔بھون جوشی نے کہا کہ برہم بھگوان پرشو رام کی پیڑھی سے ہیں اس لئے وہ کسی سے دبنے والے نہیں ہیں ۔سنیچر کے روز دیوبند میں سماج وادی پارٹی کی جانب سے منعقدہ ایس آئی آر جائزہ میٹنگ کے دوران خطاب کرتے ہوئے بھون جوشی نے کہا کہ اترپردیش میں سال 2027کے اسمبلی الیکشن کے بعد پی ڈی اے کی حکومت قائم ہونے جارہی ہے ،انہوں نے کہا کہ سروے کے دوران ووٹروں کے نام لسٹ سے غائب کرنے کی سازش کی گئی ہے ؛لیکن سماج وادی پارٹی نے اپنے کارکنان اورلیڈران کی محنت کے بدولت اس سازش کو ناکام کردیا ۔انہوں نے کہا کہ پی ڈی اے کا رکنان کی جانب سے بوتھ سطح پر کئے گئے اقدامات قابل ستائش ہیں ،انہوں نے پارٹی کارکنان سے اپیل کرتے ہوئے کہا کہ دوسرے مرحلہ میں بھی کارکنان الرٹ رہیں اور ایک ووٹ پر نظر رکھیں ،انہوں نے کہا کہ بی جے پی کو اس کی چالاکیوں دھوکہ بازیوں اور ہرایک مورچہ پر ناکام کرنا سماج وادی پارٹی کارکنان کا اصل مقصد ہے ۔پارٹی کے ضلع صدر عبدالواحد نے کہا کہ سہارنپور میں ہر ایک اسمبلی پر سماج وادی کا رکنان کی جانب سے کئے گئے اقدامات بے مثال ہیں ۔انہوں نے امید ظاہر کی کہ کارکنان کے دم پر ہی 2027کے اسمبلی الیکشن میں اکھلیش یادو کو وزیر اعلیٰ بنانا ممکن ہوگا ۔انہوں نے کہا کہ جن کارکنان نے ایس آئی آر کے سروے اورجائزے میں اچھا کام کیا ہے ان کا رکنان کو اعزازات سے نوازا جائے گا ۔سماج وادی پارٹی کے سابق ایم ایل اے منوج چودھری نے کہا کہ دیوبند میں اس مرتبہ سماج وادی پارٹی بہت بڑے فرق سے کامیابی حاصل کرے گی ۔ایس آئی آر کے جائز ہ کے بعد بی جے پی اترپردیش کی لڑائی سے باہر ہوچکی ہے ۔منوج چودھری نے کہا کہ آنے والا وقت سماج وادی پارٹی کا ہے جس میں کسانوں سے لے کر غریب نوجوانوں ،دلتوں ،پسماندہ ،برہمنوں اور سماج کے سبھی کمزور طبقات کو عزت واحترام بخشا جائے گا ۔ اس میٹنگ سے پدم سنگھ گوجر ،اسمبلی حلقہ کے صدر رمیش پنوار ،گنا سمیتی کے سابق صدر دلشاد گوڑ ،پسماندہ سیل کے صد ر رام کشن سینی ،وپن تیاگی اور روی کانت تیاگی نے بھی خطاب کیا ۔اس موقع پر سماج وادی پارٹی کے سیکڑوں کا رکنان موجود رہے ۔
