لکھنؤ،(یواین آئی) الیکشن کمیشن (ای سی آئی) نے منگل کے روز خصوصی گہری نظر ثانی (ایس آئی آر) مہم کے تحت اتر پردیش کی ڈرافٹ (مسودہ) انتخابی فہرست جاری کی ہے، جس میں تقریباً دو کروڑ 89 لاکھ نام ہٹادیے گئے ہیں۔اب ایس آئی آر ڈرافٹ لسٹ میں کل ووٹروں کی تعداد 15.44 کروڑ سے کم ہو کر 12.56 کروڑ رہ گئی ہے، جو کہ تقریباً 18.70 فیصد کی کمی ہے۔ ریاست کے چیف الیکٹورل آفیسر نو دیپ رنوا نے منگل کو بتایا کہ 27 اکتوبر کو ووٹر لسٹ جاری کرتے وقت ریاست میں 15 کروڑ 44 لاکھ 30 ہزار 92 ووٹرز رجسٹرڈ تھے۔ جن میں سے 12 کروڑ 55 لاکھ 56 ہزار 25 ووٹروں کے فارم موصول ہوئے، جو کل ووٹروں کا 81.30 فیصد ہے۔ منگل کو لوک بھون میں منعقدہ پریس کانفرنس کے دوران نو دیپ رنوا نے کہا کہ 27 اکتوبر 2025 کو پہلے مرحلے کی ووٹر لسٹ کو منجمد (فریز) کیا گیا تھا۔ اس کے بعد 4 نومبر 2025 سے تصدیق کا مرحلہ شروع ہوا جو 26 دسمبر 2025 تک جاری رہا۔ انہوں نے بتایا کہ اس نظر ثانی کے دوران 46,23,796 ووٹرز فوت شدہ پائے گئے، جو کہ 2.99 فیصد ہیں۔اسی طرح 79,52,190 ووٹروں کا سراغ نہیں لگ سکا جب کہ 12,97,74,72 (1.29 کروڑ) ووٹرز دوسری جگہ منتقل ہو چکے تھے۔ اس کے علاوہ 25.47 لاکھ ووٹرز ایسے نشان زد کیے گئے جن کے نام فہرست میں ایک سے زیادہ جگہ درج تھے، اب ان کا نام صرف ایک ہی جگہ برقرار رکھا جائے گا۔ انہوں نے کہا کہ ووٹروں کی سہولت کے لیے ایک پولنگ مرکز پر 1200 سے زیادہ ووٹر نہ ہوں، اس کے پیش نظرریاست میں 15,430 نئے پولنگ مراکز بنائے گئے ہیں۔
