دیوبند،سماج نیوز سروس: اسپیشل ٹاسک فورس (ایس ٹی ایف) اتر پردیش نے کرپٹو کرنسی اور غیر ملکی کرنسی میں سرمایہ کاری کے نام پر عوام سے کروڑوں روپے کی ٹھگی کرنے والے ایک منظم گینگ کے سرغنہ کو گرفتار کر لیا ہے۔ ملزم کو سہارنپور کے دہلی روڈ واقع کولابا ریسٹورنٹ سے حراست میں لیا گیا۔ گرفتار ملزم کی شناخت جتیندر رام ولد جے چندر، ساکن رامپور کمبویان، تھانہ بلاسپور ضلع یمنا نگر (ہریانہ) کے طور پر ہوئی ہے، جو آن لائن ٹریڈنگ کمپنی ‘‘سی پرائم کیپٹل’’ کے نام سے ملک بھر میں دھوکہ دہی کا نیٹ ورک چلا رہا تھا۔ایس ٹی ایف کی تحقیقات میں انکشاف ہوا کہ ملزم اور اس کے ساتھی سوشل میڈیا اور مختلف سیمینارز کے ذریعے لوگوں کو بھاری منافع کا لالچ دے کر سرمایہ کاری کے لیے آمادہ کرتے تھے۔ اس کے بعد سرمایہ کاروں کو ‘‘ایم ٹی-5’’ نامی ایپ پر جعلی آئی ڈیز بنا کر فرضی منافع دکھایا جاتا تھا، جبکہ اس ایپ کا مکمل کنٹرول گینگ کے پاس ہوتا تھا۔سرمایہ کاری کے نام پر لوگوں سے 50 ہزار روپے یا اس سے زائد رقم وصول کی جاتی تھی، جسے بعد میں کرپٹو کرنسی میں تبدیل کر کے بیرونِ ملک اکاؤنٹس میں منتقل کر دیا جاتا تھا۔ تفتیش کے مطابق اس گینگ کا نیٹ ورک دبئی اور ماریشس سے بھی آپریٹ کیا جا رہا تھا۔دوران تفتیش ملزم نے انکشاف کیا کہ اس کے گینگ میں ملک بھر میں تقریباً 3500 ایجنٹ سرگرم ہیں، جن کے ذریعے 30 ہزار سے زائد جعلی آئی ڈیز بنائی گئیں اور700 سے800 کروڑ روپے تک کی خطیر رقم اکٹھی کی گئی۔ گینگ نے بھارت میں کئی شیل کمپنیاں بھی قائم کر رکھی تھیں، جن کے ذریعے اس رقم کو قانونی شکل دینے کی کوشش کی جاتی تھی۔ اس پورے نیٹ ورک میں موہت رانا، گورو سنگھ اور گیتا ہزاریکا سمیت کئی دیگر افراد بھی شامل ہیں، جو اس وقت مفرور بتائے جا رہے ہیں۔ ایس ٹی ایف ٹیم نے خفیہ اطلاع کی بنیاد پر کارروائی کرتے ہوئے ملزم کو گرفتار کیا۔ پولیس کے مطابق گرفتار ملزم کے خلاف قانونی کارروائی جاری ہے، جبکہ دیگر مفرور ملزمان کی گرفتاری کے لیے ٹیمیں سرگرم کر دی گئی ہیں۔ اس کے ساتھ ہی معاملے کی رپورٹ متعلقہ انفورسمنٹ ایجنسیوں کو بھی بھیجی جا رہی ہے تاکہ مالی بے ضابطگیوں کی مزید چھان بین کی جا سکے۔
