محمد زاہد امینی
نوح،میوات،سماج نیوزسروس :جمعیت علماء فرید آباد کی جانب سے میوات کی ہونہار بیٹی عائشہ بنت قاری محمد رمضانؒ کو ہریانہ بورڈ کی 12ویں جماعت میں 80 فیصد نمبرات حاصل کرنے پر گلدستۂ پیش کر اعزاز سے نوازا اور ان کے تئیں نیک خواہشات کا اظہار کیا۔اس موقع پر علماء، سماجی شخصیات،معززینِ شہر اور جمعیت علماء کے ذمہ داران نے طالبہ کی محنت،دینی وابستگی اور اسلامی تشخص کے ساتھ تعلیمی میدان میں نمایاں کامیابی کو قابلِ تحسین قرار دیا۔مقررین نے کہا کہ عائشہ ایک ایسے دینی وعلمی خانوادے سے تعلق رکھتی ہیں جس نے ہمیشہ قوم و ملت کی بے لوث خدمات کیں۔واضح رہے کہ بچی کے والد مرحوم قاری محمد رمضانؒ فرید آباد کی معروف مذہبی وسماجی شخصیت ہونے کے ساتھ جامع مسجد عیدگاہ وجامعہ الیاسیہ دارالہدیٰ سیکٹر 6 فرید آباد کے بانی بھی تھے۔ انہوں نے پوری زندگی دین، قرآن اور ملت کی خدمت میں گزاری۔تقریب میں بتایا گیا کہ عائشہ نے مختلف تعلیمی وسماجی دشواریوں کے باوجود مکمل حجاب اور اسلامی تشخص کے ساتھ اپنی تعلیم جاری رکھی اور بعد ازاں گورنمنٹ گرلز ماڈل سینئر سیکنڈری اسکول بلب گڑھ میں داخلہ لے کر 80 فیصد نمایاں نمبرات حاصل کیے۔مقررین کے مطابق موجودہ دور میں اسلامی اقدار کے ساتھ تعلیم حاصل کرنا بھی ایک بڑی کامیابی ہے اور عائشہ نے مسلم بچیوں کے لیے حوصلہ،عزم اور اعتماد کی روشن مثال قائم کی ہے۔ اس موقع پر ضلع جمعیت علماء فرید آباد کے صدر مولانا جمال الدین نے خطاب کرتے ہوئے کہا کہ اصل کامیابی صرف اچھے نمبرات حاصل کرنا نہیں بلکہ ایمان،حجاب اور اسلامی حدود و قیود کی پابندی کے ساتھ تعلیم حاصل کرنا ہے۔عائشہ نے ثابت کیا کہ مضبوط ارادوں کے ساتھ اسلامی تشخص برقرار رکھتے ہوئے بھی کامیابی حاصل کی جا سکتی ہے۔تقریب میں ڈاکٹر محمد ساجد، ایڈوکیٹ محمد عابد ندوی،حاجی جان محمد،حافظ خلیل،ایڈوکیٹ جاوید،مولانا اسلم،مولانا انعام،مولانا محمد زکریا ودیگر معزز شخصیات و جمعیت علماء کے کارکنان موجود رہے۔
