برسٹل (یو این آئی) آسٹریلیا نے بارش کی وجہ سے روکے گئے پانچویں ون ڈے میچ میں انگلینڈ پر ڈک ورتھ لوئس طریقہ کی بنیاد پر 49 رنز سے جیت حاصل کر لی ہے۔ اس کے ساتھ ہی آسٹریلیا نے پانچ میچوں کی سیریز بھی 3-2 سے جیت لی ہے۔
اتوار کی رات دیر گئے کھیلے گئے میچ میں 28 رنز کے عوض چار وکٹیں لینے والے ٹریوس ہیڈ کو پلیئر آف دی میچ کا ایوارڈ دیا گیا۔ ٹریوس سیریز میں چھ وکٹیں لینے اور 248 رنز بنانے والے ہیڈ مین آف دی سیریز بھی رہے۔
آسٹریلیا نے ٹاس جیت کر پہلے گیند بازی کا فیصلہ کیا۔ بیٹنگ کے لیے آنے والے فل سالٹ اور بین ڈکٹ کی اوپننگ جوڑی نے پہلی وکٹ کے لیے 58 رنز جوڑے۔ فل سالٹ نے 27 گیندوں میں (45) رنز بنائے۔ بین ڈکٹ نے 91 گیندوں پر 107 رنز کی سنچری کھیلی، 13 چوکے اور دو چھکے لگائے۔ انگلینڈ کے کپتان ہیری بروک نے شاندار بلے بازی کا سلسلہ جاری رکھا اور مسلسل تیسرے میچ میں شاندار اننگز کھیلی، انہوں نے 52 گیندوں پر سات چھکوں اور تین چوکوں کی مدد سے 72 رنز بنائے۔ ان تینوں نے مل کر انگلینڈ کو صرف 25 اوورز میں 202 رنز تک پہنچا دیا۔ اس کے بعد آسٹریلوی گیند بازوں نے انگلش بلے بازوں کو آزادی سے کھیلنے کا موقع نہیں دیا۔ جیکب بیتھل (13)، عادل رشید (36)، جیمی اسمتھ (6)، لیام لیونگسٹن (0)، میتھیو پوٹس (6) رنز بنانے کے بعد آؤٹ ہوئے۔ آسٹریلوی گیند بازوں نے انگلینڈ کو 49.2 اوورز میں 309 کے اسکور تک محدود کر دیا۔ آسٹریلیا کی جانب سے ٹریوس ہیڈ نے چار وکٹیں حاصل کیں۔ ایرون ہارڈی، ایڈم زمپا اور گلین میکسویل نے دو دو بلے بازوں کو آؤٹ کیا۔
آسٹریلیا کی اننگز شروع ہوتے ہی بارش کا امکان تھا۔ اس کے پیش نظر آسٹریلوی بلے بازوں نے جارحانہ انداز میں بلے بازی کی، تاکہ وہ ڈک ورتھ لوئس اصول پر مبنی فیصلے کا فائدہ اٹھا سکیں۔ اوپنر میتھیو شارٹ نے 23 گیندوں میں اپنی نصف سنچری مکمل کی۔ شارٹ اور ہیڈ نے 7.1 اوورز میں 78 رنز جوڑے۔ ہیڈ 31 رنز بنانے کے بعد آؤٹ ہوئے اور شارٹ 58 رنز بنانے کے بعد آؤٹ ہوئے۔ اس کے بعد اسٹیو اسمتھ اور جوش انگلش نے مزید کوئی وکٹ نہ گرنے دی اور ٹیم کو 21ویں اوور تک 165 رنز تک لے گئے۔ میچ 21ویں اوور میں شروع ہونے والی بارش کی وجہ سے روک دیا گیا۔
