کہا تو یہی جاتا ہے کہ جانے والے کے ساتھ کو ئی نہیں جاتا اور زندہ انسانوں کی فطرت ہے کہ بہت جلد غم و الم کے اندوہناک سانحے کو بھی بھول جاتا ہے۔یہ نظام قدرت بھی ہے اور فانی دنیا کی سب سے بڑی سچائی بھی۔لیکن خدا نے ہمیں جو شعور بخشا ہے اس کا جائز استعمال کرتے ہوئے بھی اپنے معروف بزرگوں کی رحلت سے قائم ہونے والے خلا کو دیکھ کر غم و اندوہ کے سمندر میں ڈوب جاتے ہیں۔ایک ایسے دور میں جب ملت روز بروز بے یارو مددگار ہوتی جا رہی ہے۔ہمارے اپنے اعمال اسلامی تربیت کی کمی کے باعث بد سے بدتر ہوتے جا رہے ہیں۔ہم نے قرآن سے رشتہ توڑ لیا ہے،بیجا رسوم و عادات اپنا کر اپنے معاشرے کو پراگندہ کر رہے ہیں۔اخلاق ہماری زندگی میں مفقود ہو چکا ہے اور پڑوسی تک ہمارے شر سے بچنے کی دعائیں مانگ رہا ہے۔اس دور میں گنتی کے جو چند علماءہمارے درمیان باقی ہیں وہ بھی ایک ایک کر کے رخصت ہو رہے ہیں۔ معروف عالم دین حضرت اقدس الحاج مولانا محمد سمیر الدین صاحب قاسمی کی شخصیت بھی ہمارے لئے اللہ کی ایک ایسی برکت تھے جو اب ہم سے رخصت ہو کر سفر آخرت پر روانہ ہوگئے۔مرحوم جنہیں مرحوم لکھتے ہوئے بھی کلیجہ کانپتا ہے، کشن گنج کی معروف علمی و دینی شخصیت تھے ،وہ بزرگ عالم دین، شیخ الاسلام حضرت مولانا سید حسین احمد مدنی صاحب نور اللہ مرقدہ کے آخری شاگرد مدرسہ رشیدیہ لوہیا کاندر ضلع کشن گنج بہار کے بانی و مہتمم تھے۔ حضرت مولانا محمد سمیر الدین قاسمی نے بروز منگل 21مارچ2023 کو قریب 12 بجے آخری سانس لی اور اس فانی دنیا کو الوداع کہا۔مرحوم کشن گنج کی معروف علمی شخصیت تھے ، آپ نے قریب 90 سال کی عمر پائی ادھر کئی مہینوں سے بیمار تھے، آپ اس پیرانہ سالی میں بھی کھڑے ہوکر نماز با جماعت ادا فرماتے، ہر وقت اللہ کے ذکر میں مصروف رہتے، ان کی بے نفسی اور سادگی ضرب المثل تھی، آپ نے آج سے تقریبا69 سال قبل اپنے آبائی گاؤ ں لوہیا کاندر کے ویرانے میں ایک مدرسہ کی بنیاد رکھی جو آج ایک تناور درخت کی شکل میں اپنا فیض لٹا رہا ہے۔
آپ شیخ الحدیث حضرت مولانا محمد زکریا صاحب سہارنپوری نور اللہ مرقدہ کے فیض یافتہ، قطب زماں شیخ الحدیث حضرت مولانا منور حسین صاحب التاباڑی کے منظور نظر اور قطب وقت حضرت مولانا محمد امام الدین صاحب خلیل آباد کھتاٹولی علیہ الرحمہ کے خلیفہ مجاز تھے، ان کے جانے سے جو خلا واقع ہوا ہے اس کے پر ہونے کی امید نہیں، آپ سیمانچل کی5 معروف بزرگ شخصیات میں سے آخری بزرگ عالم دین تھے، ان کی نماز جنازہ ان کے آبائی گاؤ ں لوہیا کاندر میں بعد نماز عصر5 بجے مدرسہ کے قریب ان کے بڑے صاحبزادہ و خلیفہ مجاز جناب الحاج مولانا عبد القیوم صاحب کی امامت میں ادا کی گئی اور وصیت کے مطابق انہیں عام قبرستان سے متصل ان کی اپنی زمین میں لاکھوں سوگواروں نے سپرد خاک کیا، رب کریم غریق رحمت کرے اور تمام پسماندگان کو صبر جمیل عطاءفرمائے آمین۔سیمانچل کے لوگ چاہے وہ دنیا کے کسی بھی کونے میں ہوں افسردہ ہیں کیونکہ سیمانچل سے آج پھر ایک ایسا جنازہ اٹھا ہے جیسا الحاج مولانا اسرار الحق قاسمی کا اٹھا تھا۔
اسرار الحق قاسمی بھی اسی زمین سے اٹھے تھے اور اپنی گوناں گوں صلاحیتوں کی بدولت نہ صرف بلکہ سیاست بام عروج تک پہنچے مولانا اسرار قاسمی ایک عالم دین، سیاست دان، کالم نگار اور کشن گنج نشست سے رکن پارلیمان بھی تھے۔ نیز جمعیتہ علمائے ہند کے صوبائی صدر، آل انڈیا ملی کونسل کے نائب صدر، دار العلوم دیوبند کے رکن شوریٰ اور آل انڈیا مسلم پرسنل لا بورڈ کے رکن بھی تھے۔آج ایک سانحے کی خبر مجھے اس وقت ملی جب میں پریس کلب آف انڈیا دہلی میں ایک مخصوص میٹنگ کے لئے گیا تھا،وہیں مجھے میرے بھائی جیسے دوست دانش انورملے جن کا تعلق سیمانچل کی سرزمین سے ہے، لیکن ایک طویل عرصہ سے دہلی میں مقیم ہیں اور سوشل ورکر کے ساتھ انٹر پریونر شپ کرتے ہیں۔ہم دونوں نے بہت دیر تک مولانا سمیر مرحوم کے سانحہ ارتحال اور مولانا اسرار الحق قاسمی سے متعلق یاد داشتوں کے صفحات کا آموختہ کیا اور پھر رب سماوات کے حضور دعا کی کہ اللہ سیمانچل کی دھرتی کو علم و دانش کی ایسی ہی شخصیات پھر عطا کر۔
