بہارشریف (ایم ایم عالم) نالندہ ضلع میں دل دہلا دینے والا واقعہ سامنے آیا ہے جہاں گھریلو ناچاقی سے دلبرداشتہ خاتون نے اپنی 6 سالہ بیٹی سمیت خودکشی کا انتہائی اقدام کرلیا۔دونوں کی وی ایم ایس پاواپوری میں علاج کے دوران موت ہوگئی۔یہ واقعہ رہوئی تھانہ علاقے کے رام پور گاؤں میں پیش آیا۔مرنے والوں کی شناخت رام پور گاؤں کے رہنے والے پنٹو کمار کی بیوی 27 سالہ مالو دیوی اور ان کی چھ سالہ بیٹی پریا کماری کے طور پر پہچان کی گئی ہے۔خاندان والوں کے مطابق مالو دیوی اصل میں بہار کے تھانہ علاقے کے تحت پٹوانہ گاؤں کی رہنے والی تھی۔اس کی شادی پنٹو کمار سے 2016 میں ہوئی تھی۔شادی کے کچھ عرصے بعد اس کے شوہر اور اس کی سگی بہن کے درمیان محبت کا سلسلہ شروع ہو گیا، جس کے نتیجے میں خاندانی تنازعہ شروع ہو گیا۔شوہر پر یہ بھی الزام ہے کہ جب اس نے احتجاج کیا تو اس نے اس پر حملہ کیا۔2018 میں اس کے شوہر نے اپنی سالی سے شادی کی،جس کی وجہ سے مالو دیوی نے پولیس اسٹیشن میں شکایت درج کروائی۔شوہر کو گرفتار کرکے جیل بھیج دیا گیا۔ خاندان والوں نے یہ بھی بتایا کہ جیل سے واپس آنے کے بعد اس کے شوہر نے اس پر مقدمہ واپس لینے کے لیے دباؤ ڈالا۔اس ذہنی تناؤ کے درمیان خاتون بدھ کے روز دوپہر رہوئی بازار پہنچی،جہاں دونوں کی طبیعت اچانک بگڑ گئی۔پڑوسیوں کی مدد سے انہیں پہلے ماڈل ہسپتال بہارشریف لے جایا گیا جہاں سے ان کی حالت نازک ہونے کے باعث انہیں اعلیٰ مرکز ریفر کر دیا گیا۔ماں بیٹی دونوں کی VIMS پاواپوری میں علاج کے دوران موت ہوگئی۔متوفی کے والد نے بہار پولس اسٹیشن میں ایک تحریری شکایت درج کرائی،جس میں پانچ لوگوں پر انہیں جان سے مارنے کی دھمکی دینے اور زبردستی زہر دینے کا الزام لگایا ہے۔رہوئی پولیس اسٹیشن انچارج للت وجے نے بتایا کہ دونوں لاشوں کو پوسٹ مارٹم کے بعد لواحقین کے حوالے کردیا گیا ہے۔کیس کی تمام پہلوؤں سے تفتیش کی جارہی ہے۔ابتدائی طور پر معلوم ہوتا ہے کہ خاتون نے گھریلو جھگڑے کی وجہ سے ذہنی پریشانی کے باعث خودکشی کا قدم اٹھایا۔ فی الحال پولیس کی تفتیش جاری ہے۔
