محمد زاہد امینی
نوح،میوات،سماج نیوز سروس: آئندہ یکم جنوری سے اسکولوں میں موسم سرما کی ہو رہی چھٹیوں کے دوران علاقہ میں اُردو کے فروغ کے لئے تنظیم کے عہدے داران پوری لگن و جذبہ کے ساتھ کام کریں اور یہ کہ اگر ہم ان چھٹیوں کو اردو کے فروغ کے تعلق سے صحیح استعمال کرنا چاہتے ہیں تو ہمیں ایک ٹا گیٹ بنا کر کام کرنا ہوگا۔مذکورہ خیالات کا اظہار تنظیم فروغ اُردو میوات کے قائم مقام صدر ماسٹر نسیم احمد نے کیا۔وہ گذشتہ روز نوح میں منعقد انتظامیہ کی اپنی پہلی میٹنگ کو خطاب کر رہے تھے۔انہوں نے کہا کہ مجھے اُمید ہے کہ کارکنان تنظیم ہر سال کی طرح امسال بھی ان چھٹیوں میں اردو کے فروغ کے لئے زیادہ سے زیادہ وقت دینگے۔اس موقع پر ماسٹر نجم الدین نے موسم سرما کی چھٹیوں میں تنظیم کی طرف سے بچوں کے تربیتی کیمپ و کرکٹ ٹورنا منٹ کرانے کا مشورہ دیا۔نجم الدین نے کہا کہ اس سے جہاں علاقہ میں ہماری تنظیم کی مقبولیت میں اضافہ ہوگا وہیں تنظیم کی توسیع بھی ہوگی۔وہیں سرپرست اعلیٰ ڈاکٹر قمر الدین ذاکر و ماسٹر اشرف میواتی نے چھٹیوں میں شاعری و ادبی نشست کرانے کی بات رکھی۔علاوہ ازیں مولانا مستقیم ندوی نے طلباء کے درمیان سیرت پاک کوئز کمپٹیشن کی رائے پیش کی۔قبل ازیں مفتی مصطفیٰ کی تلاوت قرآن و مولانا صدیق سنابلی کے ترجمہ کے ساتھ میٹنگ کا باضابطہ طور پر آغاز ہوا جس کے بعد گذشتہ دنوں منعقد ہوئے اعزازی اجلاس کی کامیابیاں و خامیاں پر تفصیلی گفتگو ہوئی۔بعد ازیں صدر صاحب کی جگہ فی الوقت موسم سرما کے لیے ماسٹر نسیم احمد کو اتفاق رائے سےقائم مقام صدر کی ذمہداری دی گئی۔سبھی ساتھیوں نے نسیم احمد کو مبارکباد پیش کرتے ہوئے پورے تعاون کی یقین دھانی کرائی۔اس موقع پر نائب صدر خالد میواتی،خازن محمد اسلم،حلقہ صدر حکیم الدین چندینی،بھائی مبارک وبھائی عبدالقادر وغیرہ موجود رہے۔مولانا قمرالدین ذاکر کی دعاء پر میٹنگ کا اختتام ہوا۔
