نئی دہلی، (یو این آئی) ہندوستان کی سپریم کورٹ نے بمبئی ہائی کورٹ کے اس حکم کو چیلنج کرنے والی انل امبانی کی درخواست پر راحت دینے سےانکار کر دیا ہے جس میں بینکوں کو ان کے قرض کے کھاتوں کو فراڈ قرار دینے کی کارروائی جاری رکھنے کی اجازت دی گئی تھی۔یہ معاملہ بمبئی ہائی کورٹ کے اس فیصلے سے متعلق ہے جس نے دو بینکوں کو انل امبانی کے لون اکاؤنٹ کو فراڈ کے طور پر درجہ بندی کرنے کی اجازت دی تھی۔ ہائی کورٹ نے دسمبر 2025 کے اس حکم کو کالعدم قرار دے دیا تھا جس کے تحت انل امبانی کو عبوری راحت دی گئی تھی۔ ہندوستان کے چیف جسٹس (سی جے آئی) سوریہ کانت کی قیادت میں سپریم کورٹ کی بنچ نے مشاہدہ کیا کہ بمبئی ہائی کورٹ کی ڈویژن بنچ کا حکم زیر التوا مقدمے کی راہ میں نہیں آنا چاہیے اور ہائی کورٹ سے درخواست کی کہ وہ اس کیس کو جلد از جلد نمٹائے۔ عدالت نے واضح کیا کہ سنگل بنچ کے حکم کے مطابق، ڈویژن بنچ کا حکم زیر التوا مقدمے کی میرٹس پر اثر انداز نہیں ہوگا۔ ہم بمبئی ہائی کورٹ سے درخواست کرتے ہیں کہ دیوانی مقدمے کو تیزی سے نمٹایا جائے۔عدالت نے مزید کہا کہ اگر درخواست گزار کے پاس قانون میں کوئی دوسرا چارہ موجود ہے تو وہ اسےاستعمال کرنے کے لیے آزاد ہے۔ درخواست گزار کے اس بیان پر کہ وہ بینکوں کے ساتھ تصفیہ کرنا چاہتے ہیں، ہم کسی رائے کا اظہار نہیں کرتے۔ انل امبانی کے لیے مشکلات اس وقت مزید بڑھ گئیں جب حال ہی میں انفورسمنٹ ڈائریکٹوریٹ (ای ڈی) نے ان کے دو قریبی ساتھیوں کو گرفتار کر لیا۔ بدھ کے روز ای ڈی نے انل دھیروبھائی امبانی گروپ (اے ڈی اے جی) کے سابق سینئر ایگزیکٹو امیتابھ جھنجھن والا کو منی لانڈرنگ کی تحقیقات کے سلسلے میں گرفتار کیا، جس کا تعلق ریلائنس ہوم فنانس لمیٹڈ اور ریلائنس کمرشل فنانس لمیٹڈ جیسے گروپ اداروں سے وابستہ مبینہ بینکنگ فراڈ سے ہے۔ای ڈی نے ریلائنس کیپیٹل لمیٹڈ کے سابق چیف فنانشل آفیسر (سی ایف او) اور چیف آپریٹنگ آفیسر (سی او او) امیت باپنا کو بھی گرفتار کیا، جنہوں نے 2008 سے 2020 کے درمیان اس عہدے پر خدمات انجام دیں۔ بعد ازاں کمپنی نے اس معاملے پر اپنا ردعمل ظاہر کرتے ہوئے ایک بیان میں کہا کہ امیتابھ جھنجھن والا نے ستمبر 2019 میں (تقریباً سات سال قبل) گروپ چھوڑ دیا تھا۔ اس کے بعد ان کا گروپ سے کوئی تعلق نہیں رہا، بشمول ریلائنس انفراسٹرکچر لمیٹڈ اور ریلائنس پاور لمیٹڈ۔ اپنی وابستگی کے دوران انہوں نے ریلائنس گروپ کے گروپ مینیجنگ ڈائریکٹر کے ساتھ ساتھ ریلائنس کیپیٹل لمیٹڈ کے وائس چیئرمین اور ڈائریکٹر کے طور پر خدمات انجام دیں۔بیان میں مزید کہا گیا کہ امیت باپنا نے دسمبر 2019 میں (تقریباً سات سال قبل) ریلائنس گروپ چھوڑ دیا تھا۔ اس کے بعد ان کا گروپ سے کوئی تعلق نہیں رہا، بشمول ریلائنس انفراسٹرکچر لمیٹڈ اور ریلائنس پاور لمیٹڈ۔ اپنی وابستگی کے دوران انہوں نے ریلائنس کیپیٹل لمیٹڈ کے چیف فنانشل آفیسر کے ساتھ ساتھ ریلائنس ہوم فنانس لمیٹڈ کے ڈائریکٹر کے طور پر بھی خدمات انجام دیں۔
