معہد عائشہ صدیقہ میں سالانہ تقسیم اسناد تقریب کا انعقاد

دیوبند،سماج نیوز سروس:تعلیم نسواں کے معروف قدیم دینی ادارہ معہد عائشہ الصدیقہ قاسم العلوم للبنات دیوبند میں جلسہ تقسیم اسناد اور تکمیل بخاری کی تقریب ہیرا گارڈن میںمنعقد ہوئی، جس میں ملک کے مختلف علاقوں سے آئی ہوئی دو ہزار سے زائد خواتین نے شرکت کی۔ پروگرام کا آغاز شیرین منزہ کی تلاوت کلامِ پاک اور اقراء ربان کی نعت پاک سے ہوا، جبکہ نظامت کے فرائض کلثوم مشرف نے انجام دیے۔تقریب میں تکمیل بخاری کی دعا دارالعلوم دیوبند کے سابق صدر القراء قاری عبداللہ سلیم، بانی و شیخ الحدیث معہد تعلیم الاسلام شکاگو نے کرائی۔ انہوں نے آخری حدیث پڑھائی اور بخاری شریف کے آغاز ‘‘باب بدی الوحی’’ سے لے کر اختتام کے باب ‘‘کلمتان’’ تک نہایت بصیرت افروز گفتگو کی۔ انہوں نے طالبات کو نصیحت کی کہ اپنی زبانوں کو ذکرِ الٰہی سے تر رکھیں اور علمِ حدیث کو صرف کتابوں تک محدود نہ رکھیں بلکہ اسے اپنی عملی زندگی کا حصہ بنائیں۔اس موقع پر عالمی شہرت یافتہ عالم دین مولانا ڈاکٹر یاسر ندیم الواجدی نے بھی خطاب کیا۔ انہوں نے معہد کی طویل تعلیمی خدمات اور اس کی چھبیس سالہ جدوجہد پر روشنی ڈالتے ہوئے کہا کہ ایسے دور میں جب تعلیم کے تئیں بیداری نہیں تھی، بنات اسلام کی تعلیم کے لئے اکا دکا مدارس قائم تھے ایسے میں اپنے گھر کے چند کمروں میں شروع کیا جانے والا معہد اللہ کے شکر سے آج اس مقام پر پہنچا ہے اور یہ منزل نہیں ہے بلکہ یہ سفر جاری ہے اور جاری رہے گا انشائاللہ۔ انہوں نے کہا کہ چھبیس سال قبل خواتین کے لیے منظم دینی تعلیم کا اہتمام کرنا غیر معمولی بصیرت کی علامت ہے۔ انہوں نے بانیانِ ادارہ کی خدمات کو سراہتے ہوئے کہا کہ یہ ادارہ آج اپنی 26 سالہ کامیاب تعلیمی روایت کو مکمل کر چکا ہے اور اس کے ثمرات پورے ہندوستان میں محسوس کیے جا رہے ہیں۔ انہوں نے فارغ ہونے والی طالبات کو مخاطب کرتے ہوئے کہا کہ وہ اپنی ذمہ داری کا احساس کریں اور تبلیغ دین اور اشاعت اسلام میں سرگرم کردار ادا کریں۔پروگرام کی مہمان خصوصی، اہلیہ مولانا محمد سفیان قاسمی مہتمم دارالعلوم وقف دیوبند نے اپنے خطاب میں طالبات کی تعلیمی پیش رفت پر خوشی کا اظہار کرتے ہوئے کہا کہ ادارہ کی تعلیمی جھلکیاں نہایت متاثر کن اور قابل مبارکباد ہیں۔ انہوں نے کہا کہ دیوبند میں لڑکیوں کی تعلیم و تربیت کے لیے اس معیار کا ادارہ ہونا باعثِ اطمینان ہے۔اسی طرح مولانا سلمان بجنوری استاذ حدیث دارالعلوم دیوبند کی اہلیہ نے بھی اپنے تاثرات پیش کیے اور طالبات کو نصیحت کی کہ وہ اپنے علم پر عمل کریں، خدمت کا جذبہ پیدا کریں اور جو کچھ سیکھا ہے اسے دوسروں تک پہنچانے کی کوشش کریں، نیز اپنی ذمہ داریوں کی ادائیگی میں کسی قسم کی کوتاہی نہ برتیں۔معہد کی پرنسپل محترمہ عفت ندیم الواجدی صاحبہ نے ادارہ کی ہمہ جہت خدمات پر تفصیلی روشنی ڈالی۔ انہوں نے بتایا کہ ادارہ نہ صرف تعلیمی بلکہ تربیتی میدان میں بھی نمایاں خدمات انجام دے رہا ہے۔ شعبہ حفظ، عالمیت، تخصص فی الشریعہ، کمپیوٹر، پرائمری سیکشن، مومنہ کورس، بزم عائشہ اور رفعت لائبریری جیسے شعبے ادارہ کی مضبوط تعلیمی بنیاد کی عکاسی کرتے ہیں۔